Қорақалпоғистон Республикаси прокуратураси ва ички ишлар органлари ходимлари учун сайёр ўқув ва амалий машғулотлар ташкил этилди

Ҳуқуқни муҳофаза қилиш академиясининг Рақамли криминалистика илмий-тадқиқот институти ходимлари томонидан Қорақалпоғистон Республикасида “Ахборот технологиялари ёрдамида содир этилган жиноятчилик аҳволи, амалиётдаги муаммолар, бу тоифадаги жиноятларни фош этиш ва тергов қилиш самарадорлигини ошириш” мавзусида навбатдаги сайёр ўқув ва амалий машғулот ўтказилди.

Машғулот Бош прокурорнинг биринчи ўринбосари Б.Валиев раҳбарлигидаги ишчи гуруҳ томонидан Ўзбекистон Республикаси Президентнинг 2025 йил 3 январдаги ПҚ-1-сон қарори ҳамда жорий йилнинг 5 март куни Давлат раҳбари томонидан Коррупцияга қарши курашиш Миллий Кенгашининг йиғилишида тергов сифатини ошириш бўйича берилган топшириқлар ижросини таъминлаш мақсадида Нукус шаҳрида ўтказилган ўқув-амалий семинар доирасида ташкил этилди.

Тадбирда Қорақалпоғистон Республикаси прокурори, Ички ишлар вазири, Бош прокуратура ва республика прокуратураси масъуллари ҳамда туман (шаҳар) прокуратуралари терговчилари ва ёш мутахассислари, Департаментнинг республика бошқармаси терговчилари, Ички ишлар вазирлиги ва туман (шаҳар) ИИБ терговчилари, Эксперт-криминалистика маркази ходимлари, Республика суд-тиббий экспертиза илмий-амалий маркази Қорақалпоғистон Республикаси филиали мутахассислари иштирок этишди.

Иштирокчиларга Академиянинг Рақамли криминалистика илмий-тадқиқот институти имкониятлари ёритилиб, терговчилар ва уларни назорат қилувчи прокурорлар учун кибержиноятларни фош этиш ҳамда тергов қилишда ўтказилиши лозим бўлган экспертиза турлари, рақамли технологиялар ёрдамида содир этилган кибержиноятларни фош этишнинг ўзига хос хусусиятлари ва махсус воситаларни қўллаш услублари, ҳодиса жойини кўздан кечириш, виртуал ҳолда қайта кўриб чиқиш имконини берувчи 360 градусли сферик видеокамераларни қўллаш имкониятлари атрофлича тушунтирилди.

Шу билан бир қаторда Академияда тайёрланган “Ахборот технологиялари соҳасидаги жиноят ишларини юритишда терговчининг ён дафтари” услубий қўлланма мазмун-моҳияти ва уни амалиётда қўллашнинг афзалликлари таништирилди.

Сайёр ўқув-амалий машғулот давомида шунингдек Рақамли криминалистика илмий-тадқиқот институти томонидан амалиётда фойдаланиб келинаётган рақамли далиллар билан ишлашга мўлжалланган техник ва аппарат дастурий воситалар барча иштирокчиларга таништирилиб, ҳар бирининг техник имкониятлари таништириб ўтилди.

Академия томонидан жойларга чиққан ҳолда ўқув ва амалий машғулотлар ўтказиш давом эттирилади.