Ҳуқуқни муҳофаза қилиш академияси ва Париж-Сакле университетининг қўшма илмий-тадқиқоти муваффақиятли якунланди

Ўзбекистон Республикаси Ҳуқуқни муҳофаза қилиш академияси Халқаро ҳуқуқ ва инсон ҳуқуқларини ҳимоя қилиш кафедраси бошлиғи Л.Х Исоқов Франциянинг етакчи илмий марказларидан бири – Париж-Сакле университетида илмий стажировка ўтаб қайтди. У «Марказий Осиёдан келган мигрантлар ҳуқуқларини ҳимоя қилиш: ҳуқуқий асослар, давлат сиёсати ва амалиёт» мавзусида тадқиқотни амалга оширди.

Стажировка Atlas Postdoc дастури доирасида Париж-Сакле университети, Ижтимоий фанлар уйи жамғармаси (FMSH) ҳамда Франциянинг Марказий Осиё бўйича илмий институти (IFEAC) ҳамкорлигида ташкил этилди. Мазкур нуфузли ташаббус 2019 йилдан кейин PhD илмий даражасини олган, француз тилини эркин билувчи ва олий таълим ёки давлат ташкилотларида фаолият юритувчи Марказий Осиёлик ёш тадқиқотчиларга қонун устуворлиги, инсон ҳуқуқлари ва замонавий ҳуқуқий муаммолар йўналишида тадқиқотлар олиб бориш имконини беради.

Стажировка давомида Л.Исоқов Марказий Осиёлик мигрантларнинг ҳуқуқий мақоми, уларни қабул қилувчи давлатларнинг сиёсатлари, визавий ва миграция ҳуқуқлари, ҳуқуқни муҳофаза қилувчи органлар билан ўзаро ҳамкорлик ҳамда ижтимоий ҳимоя тизимини таҳлил қилди. Ушбу тадқиқот натижалари Париж-Сакле университетида ташкил этилган илмий семинарда тақдим этилди ва профессор-ўқитувчилар, магистрантлар ҳамда докторантлар томонидан катта қизиқиш билан қарши олинди.

Шунингдек, стажировка доирасида «Ўзбекистоннинг миграция соҳасидаги ҳуқуқий сиёсати» мавзусида мақола тайёрланди ва Европа халқаро миграция журналида чоп этиш учун тақдим этилди. Мақолада Ўзбекистон миллий қонунчилигининг халқаро мажбуриятлар билан уйғунлиги, инсон ҳуқуқларини таъминлаш бўйича ёндашувлар, миграция жараёнларини бошқариш механизмлари ва мигрантларни жамиятга интеграция қилиш масалалари таҳлил қилинган.

Стажировка якунлари бўйича Ўзбекистонда илмий-тадқиқот инфратузилмасини ривожлантириш, илмий кадрлар салоҳиятини ошириш ва халқаро илмий ҳамкорликни кучайтиришга қаратилган амалий таклифлар ишлаб чиқилди. Хусусан, тадқиқот натижаларини очиқ муҳокама қилиш маданиятини шакллантириш ва халқаро илмий форумларда фаол иштирокни таъминлаш масалаларига алоҳида эътибор қаратилган. Мазкур чора-тадбирлар мамлакатимиз илмий салоҳиятини мустаҳкамлаш ва Ўзбекистонни глобал академик ҳамжамиятга самарали интеграциялашувига хизмат қилиши кутилмоқда.