Ўзбекистон Республикаси Ҳуқуқни муҳофаза қилиш академияси магистратурасига 2025/2026 ўқув йили учун қабул жараёнлари давом этмоқда

Ўзбекистон Республикаси Ҳуқуқни муҳофаза қилиш академиясида магистратуранинг “Прокурорлик фаолияти” (кундузги, кечки ва масофавий), “Коррупцияга қарши курашиш”, “Инсон ҳуқуқларига оид халқаро ҳуқуқ” ҳамда “Киберхавфсизликни ҳуқуқий таъминлаш” мутахассисликларига 2025/2026 ўқув йили учун қабул жараёнлари давом этмоқда. Қабул жорий йил 31 июлга қадар Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлигининг “mydtm.uz” электрон платформаси орқали амалга оширилади.

Янги ўқув йилида магистратуранинг ушбу мутахассисликлари бўйича таълимнинг кундузги шакли учун жами 65 та, кечки шакли учун 10 та, масофавий шакли учун 35 та қабул параметрлари белгиланган.

Академия магистратурасининг “Прокурорлик фаолияти” сиртқи таълим шакли Ўзбекистон Республикаси Президентининг 2025 йил 5 майдаги “Таълим сифатини таъминлаш ва таълим хизматлари кўрсатиш тизимини такомиллаштириш бўйича қўшимча чора-тадбирлар тўғрисида”ги ПФ-76-сон Фармонига асосан 2025/2026 ўқув йилидан тугатилиб, ўқув жараёнлари масофавий шаклда ташкил этилиши белгиланган. 

Жорий ўқув йилидан бошлаб Академияда ўқиш муддати бир йилни ташкил этадиган янги ва долзарб “Киберхавфсизликни ҳуқуқий таъминлаш” магистратура мутахассислиги жорий этилди.

“Киберхавфсизликни ҳуқуқий таъминлаш” мутахассислигига қуйидаги шахслар танлов асосида қабул қилинадилар:

– “Юриспруденция” бакалавриат таълим йўналиши бўйича таянч олий юридик маълумотга эга шахслар (ташқи номзодлар);

– “Юриспруденция” бакалавриат таълим йўналиши бўйича таянч олий юридик маълумотга эга прокуратура органларининг ходимлари (шу жумладан, амалдаги кадрлар захирасидаги ходимлари), шунингдек, бошқа мутахассислик йўналишлари бўйича олий маълумотга ва бевосита прокуратура органларида камида 5 йиллик меҳнат стажига эга бўлган прокуратура органлари ходимлари (ички номзодлар);

– ваколатли давлат органларининг “Юриспруденция” бакалавриат таълим йўналиши бўйича таянч олий юридик маълумотга эга бўлган ходимлари.

Номзодлар Рақамли технологиялари вазирлиги томонидан тасдиқланган нуфузли халқаро IT-сертификатга эга бўлсалар, танловда «Информатика ва ахборот технологиялари» фанидан имтиҳон топширишдан озод қилинади ва уларга максимал балл берилади (халқаро IT-сертификатлар рўйхати Ҳуқуқни муҳофаза қилиш академияси расмий сайтида эълон қилинган).

Ушбу мутахассислик бўйича таълимнинг кундузги шаклига ўқишга қабул қилинган тингловчиларнинг охирги эгаллаб турган лавозими бўйича белгиланган тартиб ва миқдорда меҳнатга ҳақ тўлаш фонди тўловлари (пул таъминоти) сақланади.

Шунингдек, ваколатли давлат органларининг “Юриспруденция” бакалавриат таълим йўналиши бўйича таянч олий юридик маълумотга эга бўлган ходимлари хорижий тилни билиш даражаси бўйича тегишли миллий ёки халқаро сертификатга эга бўлмаган тақдирда, уларни чет тилидан Билим ва малакаларни баҳолаш агентлиги томонидан ўтказиладиган тест синовлари натижасига кўра ўқишга қабул қилиш бўйича тартиб белгиланди.

Шу муносабат билан 2025/2026 ўқув йилидан бошлаб белгиланган қабул параметрлари доирасида ваколатли давлат органларининг ходимлари Академия магистратурасининг “Прокурорлик фаолияти (масофавий) ҳамда “Киберхавфсизликни ҳуқуқий таъминлаш” мутахассисликларига ўтказиладиган танловларда иштирок этишлари мумкин.

Магистратуранинг барча мутахассисликлари бўйича танловлар август ойида ўтказилади, бу ҳақида Академиянинг расмий веб-сайти ва ижтимоий тармоқлардаги расмий саҳифаларида эълон қилиб борилади.

Ўзбекистон Республикаси Ҳуқуқни муҳофаза қилиш академияси

Ахборот хизмати