Солиқ ва божхона хизмати органлари ходимлари учун масофавий таълим курслари ишга туширилди

Бош прокуратура Академиясида солиқ ва божхона қонунчилигига 2019 йилдан бошлаб киритилаётган ўзгартириш ва қўшимчалар юзасидан видеоконференцалоқа режимида ўқув семинари ўтказилди. Тадбирда прокуратура, давлат солиқ ва божхона хизматлари ходимлари иштирок этди.

Семинарда Бош прокурор ўринбосари А.Мавлонов, Давлат солиқ қўмитаси ўринбосари Э.Гадоев, Давлат божхона қўмитаси ўринбосари М.Солиев ва Бош прокуратура Академияси бошлиғи Е.Коленко маъруза қилди.

Ўқув семинари давомида солиқ ва божхона ислоҳотларини амалга оширишда прокуратура органларига юклатилган вазифаларни бошқа мутасадди идоралар билан ҳамкорликда амалга ошириш механизмлари, солиқ сиёсатида назарда тутилаётган ўзгаришлар, божхона имтиёзларини тақдим этиш ҳамда экспортни қўллаб-қувватлаш бўйича амалга оширилаётган ислоҳотлар атрофлича муҳокама қилинди.

Шунингдек, тадбирда Бош прокуратура Академияси томонидан ишлаб чиқилган масофавий (электрон) таълим шаклидаги ўқув курслари платформаси тақдимоти ўтказилди.

Давлат солиқ хизмати органларини солиқ тўловчиларнинг бизнес-ҳамкори ва маслаҳатчиси сифатида сервисга йўналтирилган хизматга айлантириш, бюджетга қўшимча даромадлар заҳираларини аниқлаш, янги солиққа тортиш тизимига бир текис ўтишни таъминлаш каби долзарб масалалар ўқув курси дастурини ишлаб чиқишда асос бўлиб хизмат қилди.

Мазкур платформа ташкил этилаётган курснинг бир қатор қулайликлари ва афзалликларини таъминловчи инновацион таълим технологияларидан фойдаланган ҳолда ҳудудий давлат солиқ хизмати органлари ходимларини масофавий ўқитишни назарда тутади.

Ходим платформа томонидан тақдим этилган имкониятлардан фойдаланиб Интернет тармоғи орқали ўзига қулай бўлган вақтда ва исталган жойдан туриб мустақил таълим олиш, таълим платформасида яратилган форум ёки чатлар орқали ўзини қизиқтирган саволларига мутахассислардан жавоб олиш, шунингдек, реал ҳолатларга асосланган амалий топшириқларни (муаммоли вазият, казус, тест) ечиш орқали ўзининг билимини мустаҳкамлаш имконияти мавжуд. Бундай таълим шакли қисқа муддат ичида тингловчиларнинг жойлашган манзили ва сонидан қатъий назар исталган турдаги ўқитиладиган контингентни қамраб олиш имконини беради.

Ўқув семинарида ҳудудий студиялардан қатнашган иштирокчилар ўзларини қизиқтирган саволларга батафсил жавоб олдилар.