Иқтисодиёт соҳасидаги замонавий хавф-хатар ва таҳдидлар: иқтисодий жиноятларни олдини олишнинг ҳуқуқий жиҳатлари

Бош прокуратура Академияси томонидан жорий йилнинг 15 декабрь куни “Иқтисодиёт соҳасидаги замонавий хавф-хатар ва таҳдидлар: иқтисодий жиноятларни олдини олишнинг ҳуқуқий жиҳатлари” мавзусида давра суҳбати ташкил этилди.

Тадбирда Иқтисодий жиноятларга қарши курашиш департаменти, Ички ишлар вазирлиги ҳузуридаги Тергов департаменти, Давлат солиқ қўмитаси, Давлат божхона қўмитаси, Савдо-саноат палатаси, Тошкент давлат юридик университети ва Божхона институти вакиллари иштирок этдилар.

Давра суҳбати давомида Ўзбекистон Республикасининг жиноят ва жиноят-процессуал қонунчилигини такомиллаштириш Концепциясини амалга ошириш, ташқи иқтисодий фаолият ва солиқ соҳасидаги жиноятларни олдини олиш, жиноий фаолиятдан олинган даромадларни легаллаштириш, шунингдек АКТ воситаларидан фойдаланиб содир этилаётган иқтисодий жиноятларга қарши курашишнинг долзарб масалалар муҳокама қилинди.

Шунингдек, тадбирда халқаро амалиётда эътироф этилган жиноят-ҳуқуқий институтлар, норма ва стандартларни имплементация қилиш, шу жумладан юридик шахслар жиноий жавобгарлиги, жиноий даромадларни мусодара қилиш, ноқонуний бойлик орттириш ва ғаразли мақсадларда мавқеидан фойдаланиш криминализация қилиш масалалари кўриб чиқилди.