Жиноят ва Жиноят-процессуал кодексларининг лойиҳаларини ишлаб чиқиш бўйича олиб борилган тадбир

Жорий йилнинг 25-26 декабрь кунлари Ўзбекистон Республика Бош прокуратураси Академиясида БМТнинг Наркотиклар ва жиноятчилик бўйича бошқармасининг Марказий Осиёдаги минтақавий ваколатхонаси билан ҳамкорликда республиканинг жиноят, жиноят-процессуал ва жиноят-ижроия қонунчиликларини такомиллаштириш концепцияларини амалга ошириш масалаларига бағишланган халқаро давра суҳбати ташкил этилди.   

Тадбир 2017-2019 йилларда Ўзбекистон Республикаси ва БМТ НЖБ ўртасидаги ўзаро ҳамкорликни янада ривожлантириш бўйича Йўл харитасига мувофиқ ўтказилди.  

Хорижий экспертлар иштирокидаги давра суҳбати жиноят, жиноят-процессуал ва жиноят-ижроия қонунчиликлари лойиҳаларини ишлаб чиқиш бўйича ишчи гуруҳ аъзолари, яъни Олий Мажлис Қонунчилик палатаси депутатлари, Судьялар олий кенгаши, Конституциявий ва Олий суд судьялари, Бош прокуратура, вазирлик ва идоралар ходимлари, Адвокатлар палатаси ва илмий доира вакиллари учун ташкил этилди.

Экспертлар сифатида Кемерово давлат университети (Россия) профессори, ю.ф.д. Максим Гета ва жиноят ишлари бўйича одил судлов соҳасидаги халқаро эксперт Дмитрий Нурумов (Козоғистон) сўзга чиқишди. Шунингдек, видеоконференцалоқа орқали “Киев-Могилян академияси” Миллий университети (Украина) кафедраси профессори, ю.ф.д. Николай Хавронюк ҳамда Қозоғистон менеджмент, иқтисодиёт ва ҳуқуқ институтининг ҳуқуқ фанлари бўйича фалсафа доктори Сергей Саяпин ўз маърузалари билан иштирок этдилар.     

Иштирокчилар жиноий ҳуқуқбузарликларни классификация қилиш, маъмурий жавобгарлик тўғрисидаги қонунчиликни ислоҳ қилиш, жазо ва уни тайинлаш тизимини такомиллаштириш, такроран жиноятлар содир этилишини олдини олишга қаратилган институтлар ва нормаларни жорий этиш масалаларида бошқа давлатлар тажрибасини, жиноят қонунчилигини ислоҳ этиш масалаларини муҳокама қилдилар.   

Давра суҳбатининг иккинчи кунида жиноий адлиянинг процессуал томонлари, жиноят процессини рақамлаштириш, жазоларни ижро этиш, пробация институтини жорий этиш билан боғлиқ, тергов органлари ва пенитенциар муассасаларнинг таъсир доирасига тушиб қолган шахслар ҳуқуқларини ҳимоясини таъминлашга қаратилган масалалар муҳокама қилинди.   

Уччала кодексларни такомиллаштириш бўйича ишчи гуруҳларнинг фаолиятини мувофиқлаштириш ҳамда моддий ва процессуал нормаларнинг ўзаро боғлиқлигини таъминлаш нуқтаи назаридан ўтказилган тадбирнинг аҳамияти алоҳида қайд этилди.   

Хорижий экспертлар ва ишчи гуруҳлар аъзолари давра суҳбати тематикасининг турли хил жиҳатлари юзасидан фикр алмашдилар.