Коррупцияга қарши комплаенс-назорат механизмлари муҳокама қилинди

Ўзбекистон Республикаси Президентининг 2018 йил 4 декабрдаги “Жамоат хавфсизлигини таъминлаш самарадорлигини ошириш бўйича қўшимча чора-тадбирлар тўғрисида”ги ПҚ-4075-сон қарори ижросини таъминлаш мақсадида Бош прокуратура Академиясида 2019 йил 14 февраль куни Гонконгнинг жиноий даромадларни легаллаштиришга қарши курашиш ва терроризмни молиялаштиришни олдини олиш Ассоциацияси аъзоси, “Буюк келажак” эксперти А.Рахматуллаев иштирокида “Корпоратив секторда коррупцияга қарши комплаенс-назорат механизмларини жорий қилиш: миллий ва хорижий тажриба” мавзусида давра суҳбати бўлиб ўтди.

Тадбирда «Ўзбекнефтгаз», «Ўзбекистон темир йўллари», «Ўзкимёсаноат» акциядорлик жамиятлари, шунингдек Тошкент шаҳри Чилонзор туманидаги «Сувсоз», «Газтаъминот», «Электр тармоқлари» каби давлат корхоналарининг масъул ходимлари иштирок этишди.

Давра суҳбати давомида эксперт томонидан хусусий ва корпоратив секторда комплаенс-назоратини жорий қилиш соҳасидаги халқаро стандартлар, жаҳондаги ижобий амалиётлар, шу жумладан дунёда энг яхши деб тан олинган Сингапур ва Гонконг тажрибаларини ёритиб берди.

Коррупцияга оид ҳуқуқбузарликлар содир этилишининг сабаб ва шароитларини аниқлаш ва олдини олиш бўйича идоравий стратегияларнинг (комплаенс-назорат) ишлаб чиқилиши қайд этилган соҳаларда манфаатлар тўқнашувини олдини олиш, мансабдорлик жиноятлари ва суиистеъмолчилиги барвақт профилактикасининг муҳим элементи сифатида белгиланди.

Қатнашувчилар хўжалик бошқаруви органларининг турли хил секторларида мавжуд бўлган комплаенс-назорати механизмлари ҳақида фикр алмашишди.

Учрашув натижалари бўйича Чилонзор туманидаги хўжалик бошқаруви органларининг қуйи поғоналарида синов тариқасида комплаенс-назорати механизмларини жорий қилиш режалаштирилди.