“Ўзбекистон Республикаси Жиноят ва Жиноят-процессуал кодексларини такомиллаштириш масалалари” мавзусида давра суҳбати

Ўзбекистон Республикаси жиноят ва жиноят-процессуал қонунчилигини такомиллаштириш Концепциясида келтирилган устувор вазифалар доирасида жорий йилнинг 18-19 апрель кунлари Тошкент шаҳрининг “Пойтахт” бизнес-марказида Жиноят ва Жиноят-процессуал кодексларининг янги таҳрирдаги лойиҳаси йўналишлари муҳокамасига бағишланган давра суҳбати бўлиб ўтди.

Тадбир БМТнинг Марказий Осиё бўйича гиёҳвандлик ва жиноятчиликка қарши курашиш бошқармасининг минтақавий ваколатхонаси ва “Минтақавий мулоқот” ХННТ билан ҳамкорликда Бош прокуратура Академияси томонидан ташкиллаштирилди.

Давра суҳбатида парламент аъзолари, Конституциявий суд, Олий суд, Судьялар олий кенгаши судьялари, Бош прокуратура, Ички ишлар вазирлиги, алоқадор вазирлик ва идоралар ходимлари, фуқаролик жамияти институтлари вакиллари, шунингдек Ўзбекистон Республикаси жиноят ва жиноят-процессуал қонунчилигини такомиллаштириш бўйича ишчи гуруҳлар аъзолари иштирок этдилар.

Эксперт кўмаги бевосита Словения, Украина, Қозоғистон ва Қирғизистон давлатлари, шунингдек БМТ НЖБнинг халқаро мутахассислар иштирокида амалга оширилди.

Тадбирни БМТнинг НЖБ минтақавий вакили Ашита Миттал очиб, Давлат раҳбари томонидан белгилаб берилган жиноят ва жиноят-қонунчилигини такомиллаштириш Концепциясидаги вазифаларнинг долзарблигини таъкидлаб ўтди.

Тадбирнинг биринчи куни Ўзбекистон Республикаси жиноят қонунчилигидаги қилмишни жиноят ёки ножўя ҳатти-ҳаракат (проступок) сифатида таснифлаш ва бир-биридан фарқли белгиларига, жазо чораларининг турлари ва уларни қўллашдаги чегараларни қисқартириш, шунингдек жиноятда иштирокчилик ва пробация масалаларига бағишланди.

Давра суҳбатининг иккинчи кунида процессуал келишувнинг ўзига хос хусусиятлари (айбга иқрор бўлиш ҳақида келишув ва ҳамкорлик), далилларни тўплашда ҳимоячининг ваколатларини кенгайтириш ва мустаҳкамлаш, одил судловни амалга оширишда тарафлар тортишувида судларнинг ролини мустаҳкамлаш, суд назорати институти, суд қарорларини қайта кўриб чиқиш масалаларига бағишланди.