Ўзбекистон Республикасининг янги таҳрирдаги Жиноят, Жиноят-процессуал ва Жиноят-ижроия кодекслари лойиҳаларини ишлаб чиқиш

Жорий йилнинг 10-13 июнь кунлари Ўзбекистон Республикаси Бош прокуратураси Академиясида БМТнинг гиёҳванд моддалар ва жиноятчиликка қарши курашиш бошқармасининг Марказий Осиёдаги минтақавий ваколатхонаси билан ҳамкорликда Ўзбекистон Республикасининг янги таҳрирдаги Жиноят, Жиноят-процессуал ва Жиноят-ижроия кодексларининг дастлабки лойиҳалари муҳокамасига бағишланган тўрт кунлик давра суҳбати бўлиб ўтди.

Тадбирда Уилфрид Лорье университети (Канада) профессори Н.Ковалев, Украина Фанлар академиясининг В.М.Корецкий номидаги Давлат ва ҳуқуқ институти катта илмий ходими А.Банчук, “Киев-Могилянск Академияси” Миллий университетининг (Украина) Ҳуқуқий фанлар факультети жиноят ва жиноят-процессуал ҳуқуқи кафедраси профессори М.Хавронюк, БМТнинг болалар фонди (ЮНИСЕФ) эксперти Т.Кучава (Грузия), БМТнинг наркотиклар ва жиноятчилик бўйича бошқармаси коррупция ва иқтисодий жиноятларга қарши кураш соҳаси (Вена) мутахассиси К.Паликарски ҳамда экспертлари Б.Сапарбаев ва А.Асаналиев (Қирғизистон), Халқаро ҳуқуқий ҳамкорлик бўйича Германия фонди (IRZ), БМТнинг наркотиклар ва жиноятчилик бўйича бошқармаси Марказий Осиёдаги минтақавий ваколатхонаси вакиллари, “Минтақавий диалог” ХННТ, ЮНИСЕФ вакиллари, шунингдек 50 нафардан ортиқ миллий экспертлар иштирок этдилар.

Тадбир дастури “Ўзбекистон Республикасининг Жиноят, Жиноят-процессуал ва Жиноят-ижроия кодексларининг дастлабки лойиҳалари муҳокамаси – асосий масалалар ва келгуси режалар” мавзусидаги давра суҳбати, Ўзбекистон Республикасининг янги таҳрирдаги Жиноят, Жиноят-процессуал ва Жиноят-ижроия кодексларининг дастлабки лойиҳаларини тайёрлаш бўйича секциялар ишидан иборат бўлди.

Давра суҳбати давомида пробация институтини ҳамда ювенал юстицияни жорий этиш, судга қадар иш юритиш босқичи устидан суд назоратини такомиллаштириш, тезкор-қидирув фаолиятини тартибга солиш, шунингдек, процессуал келишув турлари уларнинг ўзига хос хусусиятлари, жиноятларни таснифлаш ҳамда жазо тизими, тарафларнинг тортишуви принципини кучайтириш ва жиноят процессида адвокатнинг ролини кучайтириш масалалари кўриб чиқилди.

Ишчи гуруҳларнинг хорижий мутахассислар билан консультациялар ўтказишга йўналтирилган экспертлар учрашувлари фаолияти тематик секциялар доирасида ўтказилди, бу эса ўз навбатида, нафақат асосий қонун ҳужжатлари лойиҳалари бўйича экспертлар билдирган эътироз ва таклифларни муҳокама қилиш ва инобатга олиш, балки қонун ижодкорлиги ва ҳуқуқни қўллаш бўйича амалий қарорлар ишлаб чиқилишига имконият яратиб берди.