“Электрон далилларни олишда ўзаро ҳуқуқий ёрдам ва кибержиноятларни трансмиллий тергов қилиш” минтақавий семинар-тренинги

2020 йил 5-6 март кунлари Академияда “Электрон далилларни олишда ўзаро ҳуқуқий ёрдам ва кибержиноятларни трансмиллий тергов қилиш” мавзусида Марказий Осиё мамлакатлари ҳуқуқни муҳофаза қилувчи органлари ходимлари учун минтақавий семинар-тренинг ўтказилди.

Тадбир БМТнинг Наркотиклар ва жиноятчиликка қарши курашиш бошқармасининг Марказий Осиёдаги минтақавий ваколатхонаси томонидан CASC тармоғи ташаббуси доирасида Бош прокуратура Академияси билан ҳамкорликда ташкил этилди.

Семинар-тренингда 24 нафар Қирғизистон ва Ўзбекистон ҳуқуқни муҳофаза қилувчи органлари ходимлари, шунингдек Бош прокуратура Академияси, Тошкент давлат юридик университети ҳамда ИИВ Академияси профессор ўқитувчилари таҳсил олдилар.

Тренерлар сифатида халқаро экспертлар – Португалия Бош прокуратураси Кибержиноятчиликка қарши курашиш бошқармаси прокурори ва координатори Педро Вердельо, Руминия Бош прокуратураси Уюшган жиноятчилик билан боғлиқ ишларни тергов қилиш бошқармаси катта прокурори Алекс Флорин, шунингдек Жанубий ва Марказий Осиё бўйича Facebook ишонч ва хавфсизлик бўлими раҳбари Викрам Ландех иштирок этдилар.

Тадбир иштирокчилари семинар давомида ўзлаштирган янги билимларини қўллаган ҳолда амалий топшириқларни бажардилар ва тадбир бўйича атрофлича фикр алмашдилар.

Режалаштириш, тайёргарлик, жиноят жойини кўздан кечириш, рақамли далилларни сақлаш, жумладан маълумотларни (Facebook, Instagram) сақланиши бўйича сўровлар расмийлаштириш, шунингдек ўзаро ҳуқуқий ёрдам кўрсатиш каби тезкор таъсир чораларининг тўлақонли қамрови таъминлангани тадбирнинг амалий аҳамиятини янада оширди.