Таълим муассасаларида коррупциянинг олдини олиш ва унга қарши курашишнинг маънавий-маърифий асослари

2020 йил 9 март куни Мирзо Улуғбек номидаги Ўзбекистон Миллий университетида “Таълим муассасаларида коррупциянинг олдини олиш ва унга қарши курашишнинг маънавий-маърифий асослари” мавзусидаги соҳанинг малакали мутахассислари иштирокида талаба-ёшлар билан очиқ мулоқот бўлиб ўтди.

Тадбирда Ўзбекистон Миллий университети ректори, профессор А.Р.Марахимов, Ўзбекистон Республикаси Олий Мажлиси Сенатининг Суд-ҳуқуқ масалалари ва коррупцияга қарши курашиш қўмитаси раиси Б.Д.Матмуратов, Бош прокуратура Академияси Коррупцияга қарши курашиш илмий таълим маркази бошлиғи Б.И.Исмоилов, Олий таълим вазирлиги Маънавий-ахлоқий тарбия бошқармаси бошлиғи О.Х.Базаров, ИИВ Академияси Криминология кафедраси доценти Ш.К.Рахимов иштирок этишди.

Очиқ мулоқот тарзида ўтказилган мазкур тадбирда Ўзбекистон Республикаси Президентининг 2019 йил 27 майдаги “Ўзбекистон Республикасида коррупцияга қарши курашиш тизимини янада такомиллаштириш чора-тадбирлари тўғрисида”ги ПФ-5729-сонли Фармонида белгилаб берилган вазифаларнинг ижроси, коррупция хавф-хатарларини таҳлил қилиш асосида, аҳолининг кенг қатламини ушбу иллатлардан хабардор қилиш ва фуқароларнинг айниқса ёшларнинг ҳуқуқий онги, маданиятни оширишга қаратилган чора-тадбирларни амалга ошириш, коррупцияга оид ҳуқуқбузарликларни ўз вақтида аниқлаш, уларга чек қўйиш, унга имконият яратувчи сабаблар, шарт-шароитлар ва оқибатларни бартараф этиш, коррупцияга оид ҳуқуқбузарликларни содир этганлиги учун жавобгарликнинг муқаррарлиги принципини таъминлаш каби ўта муҳим масалалар доирасида фикр-мулоҳазалар алмашилди.

Тадбирда “Олий таълим муассасаларида коррупцияга қарши курашиш чораларини кучайтириш мақсадида “комплаенс назорат” (compliance control) тизимини жорий этиш, жумладан, профессор-ўқитувчилар ва бошқа ходимларининг юриш-туриши, шунингдек улар фаолиятида коррупцияни олдини олишга қаратилган намунавий касбий деонтологик талаблар тизимини ишлаб чиқиш жараёнларини жадаллаштириш зарур”лиги ҳақида тўхталиб ўтилди.