Халқаро давра суҳбати натижалари ҳақида

Жорий йилнинг 11 декабрь куни “Windham” меҳмонхонасида БМТТД, USAID ҳамда Ўзбекистон Республикаси Олий судининг “Қонун устуворлиги соҳасидаги ҳамкорлик” қўшма лойиҳаси доирасида Бош прокуратура Академияси билан ҳамкорликда “Прокуратура, суд ва адвокатура органларининг қонун устуворлигини таъминлаш бўйича ўзаро ҳамкорлигининг замонавий тенденциялари” мавзусида халқаро давра суҳбати ўтказилди.

Тадбирда Буюк Британия, Туркия, Испаниядан ташриф буюрган экспертлар, Ўзбекистонда фаолият юритаётган халқаро ташкилотлар вакиллари, Ўзбекистон Республикаси Конституциявий суди ва Олий судининг судьялари, Ўзбекистон Республикаси Бош прокуратураси марказий маҳкама ходимлари, Бош прокуратура Академиясининг профессор-ўқитувчилари ва магистрантлари, Бош прокуратура ҳузуридаги Мажбурий ижро бюроси ходимлари, Ўзбекистон Адвокатлар палатаси, ИИВ Академияси, Тошкент Давлат юридик универститети, Миллий гвардия Ҳарбий техника институти, Халқаро иқтисод ва дипломатия университетининг вакиллари иштирок этдилар.

Тадбирни очиш муносабати билан сўзга чиққан Академия бошлиғи ўзининг кириш сўзида мамлакатимизда қонунчиликни такомиллаштириш, суд ҳокимиятининг чинакам мустақиллигини таъминлаш, адвокатура институтини янада ривожлантириш, фуқароларнинг ҳуқуқ ва манфаатлари ҳимоясини таъминлашда ҳуқуқни муҳофаза қилувчи органлар жавобгарлигини кучайтириш йўлида амалга оширилаётган ишлар ҳақида алоҳида тўхталиб, суд амалиётида мавжуд бўлган муаммоларнинг ечимини таъминлашда прокуратура, суд ва адвокатура идоралари ўртасидаги ҳамкорликнинг аҳамиятини таъкидлаб ўтди.

Давра суҳбати давомида Академиянинг судларда прокурор ваколатини таъминлаш кафедраси бошлиғи М.З.Раджапованинг “Фуқаролик, иқтисодий ва маъмурий суд процессларида прокурор иштирокининг процессуал-ҳуқуқий асослари” ҳамда Академиянинг суд ҳужжатлари ва бошқа органлар ҳужжатларини мажбурий ижро этиш кафедрасининг катта ўқитувчиси А.Хамидовнинг “Суд қарорлари ижроси тизимини янада такомиллаштириш масалалари” мавзуларидаги илмий-таҳлилий изланишларининг натижалари тадбир иштирокчиларининг муҳокамасига  киритилди.

Шунингдек, халқаро давра суҳбати давомида ўтказилган мунозараларда фуқароларнинг одил судловга мурожаат қилиш имкониятлари, суд жараёнининг барча босқичларида тарафлар тортишуви тамойилини таъминлаш, судларда прокурор ва адвокат иштироки, қонун устуворлигини таъминлашда прокуратура, суд ва адвокатура органларининг ҳамкорлиги, ҳорижий давлатларнинг бу борадаги тажрибаси билан боғлиқ масалалар муҳокама этилди.

Ҳорижий экспертлар тадбир иштирокчиларини Туркия, Испания ва Буюк Британия давлатларининг жиноят ва фуқаролик судлов соҳаларида одил судловни амалга ошириш, суд жараёнларида тарафлар тортишуви тамойилини таъминлаш ҳамда суд қарорларини ижро этиш соҳаларига тааллуқли бўлган қонунчилиги хусусиятлари билан таништириб ўтдилар.

Халқаро давра суҳбати натижаларига кўра прокуратура, суд ва адвокатура органларининг ҳамкорлигини такомиллаштиришга қаратилган тавсиялар ишлаб чиқилди.