Жиноят ва жиноят-процессуал қонунчилигини такомиллаштириш бўйича давра суҳбати

Бош прокуратура Академиясида Шарқий Европа ва Марказий Осиё мамлакатлари учун коррупцияга қарши курашиш тармоғи лойиҳаси доирасида ИҲТТ эксперти Дмитро Котляр иштирокида жиноят ва жиноят-процессуал қонунчилигини такомиллаштириш масалаларини муҳокамаси бўйича видеоконференцалоқа шаклида давра суҳбати бўлиб ўтди.

Тадбирда жиноят ва жиноят-процессуал қонунчилигини такомиллаштириш бўйича ишчи гуруҳ аъзолари, шунингдек Ўзбекистон Республикаси Олий суди, Судьялар олий кенгаши, Давлат хавфсизлик хизмати, Судьялар олий мактаби, Тошкент давлат юридик университети, Миллий гвардия ҳарбий-техник институти ва Бош прокуратура Академияси вакиллари иштирок этишди.

Жумладан, тадбир давомида коррупцияга оид ҳуқуқбузарликлар учун юридик шахсларнинг жавобгарлигини жорий этиш масаласи муҳокама қилинди.

ИҲТТ эксперти томонидан БМТнинг Коррупцияга қарши конвенциясида ҳамда ИҲТТнинг коррупцияга қарши курашиш бўйича Истамбул ҳаракатлар режаси 4-раунди якунига кўра Ўзбекистонга берилган тавсияларида ИҲТТ аъзо давлатларининг аксариятида қонунчилигида мавжуд бўлган, коррупция жиноятлари учун юридик шахсларнинг жавобгарлиги институтини жорий этиш назарда тутилганлиги таъкидлаб ўтилди. Шунингдек, иштирокчилар мазкур институтни қўллаш бўйича халқаро стандартлар ва илғор хорижий амалиётлар, юридик шахсларнинг жавобгарлик моделлари, жазоларнинг турлари, жавобгарликнинг мустақиллиги ва бошқа шу мавзу билан боғлиқ масалалар бўйича маълумот олишди.

Тадбир якунида иштирокчилар жиноят ва жиноят-процессуал қонунчилигини такомиллаштириш бўйича кейинги чора-тадбирлар ҳамда коррупцияга оид жиноятлар учун юридик шахсларнинг жавобгарлигини жорий этишнинг ижобий ва салбий жиҳатларига оид фикр ва мулоҳазалар билан алмашишди.