Коррупцияга қарши курашиш бўйича сайёр тренинг

2019 йилнинг 21-23 август кунлари Коррупцияга қарши курашиш бўйича республика идоралараро комиссияси ва Бош прокуратура Академияси томонидан БМТ Тараққиёт дастурининг “Ўзбекистондаги самарали, ҳисоб берувчи ва шаффоф бошқарув институтлари орқали коррупцияга қарши кураш” лойиҳаси билан ҳамкорликда Тошкент вилоятининг Бўстонлиқ туманида “2030 йилгача бўлган даврда Глобал ривожланиш кун тартиби доирасида коррупцияга қарши курашиш” мавзусидаги тренинг ўтказилди.

Тадбир БМТ Тараққиёт дастурининг Осиё-Тинч океани минтақасида тинч ва инклюзив жамиятлар учун коррупцияга қарши курашиш бўйича Глобал лойиҳаси (ACPIS) кўмагида ташкил қилинди.

Тадбирда Бош прокуратура, Олий суд, Бизнес-омбудсмен, Фуқаролик жамияти шаклланишини мониторинг қилиш мустақил институти, Ахборот ва оммавий коммуникациялар агентлиги, Бош прокуратура Академияси  вакиллари ҳамда давлат органларининг идоравий мувофиқлаштирувчилари иштирок этишди.

Тадбирда халқаро экспертлар сифатида БМТ Тараққиёт дастурининг коррупцияга қарши курашиш Глобал дастурининг маслаҳатчиси Анга Тимилсина, БМТ Тараққиёт дастурининг тинч ва инклюзив жамиятлар учун коррупцияга қарши курашиш бўйича Глобал лойиҳаси (ACPIS) раҳбари Аида Арутюнова ва БМТ Тараққиёт дастурининг коррупцияга қарши курашиш Глобал дастури бўйича тадқиқотлар соҳасидаги таҳлилчи Шарлин Луи қатнашишди.

Уч кунлик тренинг 2030 йилгача бўлган даврда Глобал ривожланиш кун тартиби доирасида коррупцияга қарши курашишни амалга оширишга ягона ёндашувни ишлаб чиқиш, шу жумладан 16-мақсад – “Тинчлик, одил судлов ва самарали институтлар” ва 16.5-вазифа – “Коррупцияга қарши курашиш” масалаларини муҳокама қилиш учун эксперт майдончаси бўлиб хизмат қилди.

Тажриба алмашиш билан бир қаторда, халқаро экспертлар томонидан иштирокчиларнинг 2030 йилгача бўлган даврда Глобал ривожланиш кун тартиби доирасида коррупцияга қарши курашиш бўйича самарали мониторинг ва ҳисоботни амалга ошириш ҳамда барқарор ривожланиш миллий стратегияларига коррупцияга қарши самарали механизмларни ишлаб чиқиш мақсадида соғлиқни сақлаш, таълим, қурилиш ва давлат харидлари каби тармоқларда коррупция хавфларини аниқлаш бўйича билим ва малакаларини мустаҳкамлашга қаратилган тадбирлар олиб борилди.