Осиё ва Тинч океани давлатларининг активларни қайтариш бўйича тармоғининг (ARIN-AP) тадбирларида иштирок этилди

Ўзбекистон Республикаси Бош прокуратураси Академияси вакили Ғарбий ва Марказий Осиё давлатларининг активларни қайтариш бўйича норасмий тармоғи (ARIN-WCA) Котибиятининг вазифаларини амалга ошириши доирасида жорий йилнинг сентябрь ойида Монголиянинг Улан-Батор шахрида ўтказилган Осиё ва Тинч океани давлатларининг активларни қайтариш бўйича норасмий тармоғининг (ARIN-AP) тадбирларида иштирок этди.

ARIN-APнинг йиллик умумий йиғилишида мазкур тармоқ иш фаолиятининг натижалари, ноқонуний активларнинг халқаро айланмасини олдини олиш, аниқлаш ва уларга нисбатан таъсир чораларини янада самарали усулларини қўллаш борасида давлатларнинг имкониятларини кенгайтириш ҳамда активларни қайтариш мақсадида халқаро ҳамкорликни мустаҳкамлаш масалалари муҳокама қилинди.

Тадбирда тармоққа аъзо давлатларнинг прокуратура ҳамда бошқа ҳуқуқни муҳофаза қилувчи органлар, молиявий разведка бўлинмалари ходимлари, кузатувчилар, Бирлашган Миллатлар Ташкилотининг Наркотик моддалар ва жиноят бошқармаси (UNODC), Жахон банки ва Интерпол каби халқаро ташкилотларнинг (жами 23 та давлат ва 6 та ташкилот) вакиллари иштирок этишди.

Бундан ташқари тадбир доирасида Австралия полицияси кўмагида ташкил этилган семинарда иштирокчилар томонидан ноқонуний активларга бенефициар эгалик қилишни аниқлаш усуллари, ARIN-WCAга аъзо давлатларда активларни қайтаришнинг ҳуқуқий асослари, бу соҳадаги ишларни тергов қилишнинг илғор тажрибалари, ҳуқуқий ва институционал механизмларни такомиллаштириш ва халқаро ҳамкорликни ривожлантириш масалалари кўриб чиқилди.

Тадбирлар якунида иштирокчилар активларни қайтаришда ARIN тармоқларининг салоҳиятини ошириш, бу соҳадаги тадбирларни амалга оширишда халқаро ҳамкорликни мустаҳкамлаш учун кўмак бўлувчи ўзаро тажриба ва махсус билимларни алмашиш мақсадида мазкур тармоқ доирасида ҳамкорлик қилишни янада қўллаб-қувватлашга тайёр эканликларини билдиришди.