Академияда ҳуқуқни муҳофаза қилувчи органлар терговчилари учун кибержиноятчиликка қарши курашиш ва рақамли экспертизаларни ўтказиш бўйича семинар-тренинг

Жорий йилнинг 28-31 октябрь кунлари Академияда «Кибержиноятчиликка қарши курашиш ва рақамли экспертизаларни ўтказиш» мавзусида ушбу йўналишда фаолият юритувчи мутахассис-амалиётчилар учун мўлжалланган тўрт кунлик семинар-тренинг бўлиб ўтди.

Мазкур тадбир ЕХҲТнинг Ўзбекистондаги лойиҳалар бўйича Офиси Координатори ва Ўзбекистон Республикаси Бош прокуратураси Академияси томонидан ЕХҲТ Котибиятининг полиция фаолияти стратегик масалалари бўйича бўлими кўмагида ташкил этилди.

Тадбирда Ички ишлар вазирлиги, Бош прокуратура, Давлат хавфсизлик хизмати каби ҳуқуқни муҳофаза қилувчи органларнинг 35 нафар ходими қатнашди.

Семинар дастури Дублин Университети коллежининг (UCD CCI) кибержиноятчиликка қарши курашиш ва рақамли тергов қилиш Маркази томонидан ишлаб чиқилган, рақамли тергов соҳасидаги билимлар ва касбий кўникмаларни ривожлантиришга қаратилган комплекс таълим модулини ўз ичига олган.

Мазкур семинар ўз хизмат вазифаларидан келиб чиқиб жиноят содир этилган жойга биринчи бўлиб етиб борадиган ва ўз касбий вазифаларини тезкор бажариш учун зарурий кўникмаларга эга бўлиши лозим бўлган ҳуқуқни муҳофаза қилувчи органлар ходимлари учун мўлжалланган.

Курснинг амалий аҳамияти шундаки, у ҳолатга тезкор муносабат билдиришнинг барча жиҳатларини – жиноят содир этилган жойни кўздан кечиришни режалаштириш, тайёргарлик кўриш ва ўтказишдан тортиб, то рақамли далилларни сақлаш, ҳодиса/воқеа ҳақида билдирги тайёрлаш ва кейинги тергов ҳаракатларигача бўлган жиҳатларни қамраб олган.

Ушбу семинарнинг ўзига хос жиҳати, унда Эстония полицияси ходими сифатида 16 йилдан ортиқ иш тажрибасига эга бўлган Анна Илламаа ҳамда Молдова Ҳукумати ҳузуридаги жиноий фаолиятдан олинган даромадларни легаллаштиришга қарши кураш бошқармасида 11 йиллик иш тажрибасига эга бўлган Александр Донч каби халқаро эксперт-тренерларнинг, шунингдек, фасилитатор сифатида Академиянинг икки нафар ўқитувчисининг иштирок этганликларидир.

Академия ўқитувчиларининг фасилитатор, яъни ўқув жараёнининг фаол ва объектив иштирокчилари сифатида қатнашганликлари нафақат семинарнинг умумий мақсадига эришиш ҳамда Ўзбекистонда мавжуд тергов амалиёти учун зарур курс материалларини бойитиш, балки улар учун келгусида мустақил равишда шу каби ўқув курсларини ўтказиш бўйича катта тажриба орттириш имконини берди.