Терроризмга қарши курашиш ва чегара хавфсизлиги масалаларига оид тренинг

Бош прокуратура Академиясида БМТ Гиёҳванд моддалар ва жиноятчилик бўйича бошқармаси кўмагида “Хорижий террорчи-жангариларга қарши курашиш ҳамда чегараларнинг хавфсизлигини таъминлаш тизимини такомиллаштириш мақсадида йўловчилар ҳақидаги дастлабки маълумотлар тизимидан (API) ва йўловчиларни рўйхатга олиш маълумотларидан (PNR), шунингдек биометрик маълумотлардан фойдаланиш” мавзусида икки кунлик тренинг ташкил қилинди.

Тадбирда Бош прокуратура, Давлат хавфсизлик хизмати, Давлат хавфсизлик хизмати Чегара қўшинлари, Давлат божхона қўмитаси ҳамда “Ўзбекистон Ҳаво Йўллари” Миллий авиакомпанияси вакиллари иштирок этди.

Халқаро экспертлар сифатида Халқаро миграция ташкилоти, Жаҳон божхона ташкилоти, Халқаро ҳаво транспорти ассоциацияси, Халқаро жиноят полицияси ташкилоти (Интерпол), БМТ Гиёҳванд моддалар ва жиноятчилик бўйича бошқармасининг терроризмнинг олдини олиш масалалари бўйича сектори, ЕХҲТнинг Бишкекдаги офиси, БМТ Гиёҳванд моддалар ва жиноятчилик бўйича бошқармасининг  AIRCOP лойиҳаси ҳамда Финляндия Чегара хизмати вакиллари жалб қилинди.

Иштирокчилар чегара назорати соҳасида мавжуд халқаро-ҳуқуқий стандартлар, Марказий Осиёда трансчегаравий ҳамкорлик, чегара хавфсизлигини таъминлашда халқаро ташкилотлар дастурлари ва ёндашувлари, жиноятчиликка қарши курашиш мақсадида йўловчилар ҳақидаги маълумотлар тизимини жорий қилиш ва ундан фойдаланиш бўйича алоҳида давлатлар тажрибасини муҳокама қилишди.

Тадбир терроризмга қарши курашиш ва чегара хавфсизлиги соҳасида мавжуд замонавий тенденциялар ва муаммоларни муҳокама қилиш, бу борада билим ва кўникмалар билан ўзаро алмашиш бўйича очиқ платформа шакллантиришга хизмат қилди.