Прокуратура кадрлари касбий таълими борасида тажриба алмашиш

2019 йил 26 ноябрда Бош прокуратура Академиясида Россия Федерацияси Президенти ҳузуридаги Россия халқ хўжалиги ва давлат хизмати академияси филиали – Сибирь бошқарув институти (РХХваДХА СБИ) билан ҳамкорлик битимини 2019–2020 йилларда амалга ошириш бўйича чора-тадбирлар режаси доирасида ташкил этилган “Прокурор назорати соҳасида касбий таълим: Россия ва Ўзбекистон тажрибаси” мавзусида вебинар бўлиб ўтди.

Тадбирда Россия томонидан РХХваДХА СБИ, Новосибирск вилояти прокуратураси кадрлар тармоғи, шунингдек РХХваДХА СБИ Минтақалараро малака ошириш маркази раҳбарияти ва ходимлари иштирок этдилар.

Ўзбекистон томонидан вебинарда Академия раҳбарияти ва профессор-ўқитувчилари иштирок этдилар.

Тадбир давомида россиялик ҳамкасблар Академия томонидан прокуратура органлари кадрлари малакасини оширишни ташкил этишда қўлланиладиган замонавий ёндашувлар, тингловчилар томонидан касбий билим, малака ва компетенцияларни юқори даражада ўзлаштирилишини таъминлайдиган, ўқитишнинг самарали шакл ва методлари билан таништирилди.

Кадрларни қайта тайёрлаш ва малакасини ошириш дастурлари, Академия магистратурасида ўқитишни кредит-модуль тизими асосида ташкил этиш, шунингдек ProAcademy идоравий электрон платформа асосида масофавий таълимни амалга ошириш масалалари россиялик мутахассиларда алоҳида қизиқиш уйғотди.

Ўз навбатида россиялик ҳамкорлар РХХваДХА СБИ амалиётидаги давлат ва муниципал хизматчиларини касбий ривожлантиришнинг йўналишлари ва шакллари мисолида кадрларни касбий қайта тайёрлаш борасидаги тажрибаларини тақдимот қилдилар.

Шу билан бирга, Новосибирск вилояти прокуратураси кадрлар тармоғи бошлиғи идоравий таълим муассасалари билан яқиндан ҳамкорлик қилган ҳолда прокуратура ходимлари малакасини оширишнинг асосий жиҳатлари, хусусан раҳбар лавозимларга фақатгина қайта тайёрлаш дастури бўйича ўқиган ходимларни тайинлаш амалдаги тартиби билан таништирди.

Прокуратура ходимларини қайта тайёрлаш ва малакасини ошириш прокуратура органлари самарали фаолиятининг муҳим омили эканлиги алоҳида таъкидланди.

Тадбир конструктив руҳда бўлиб ўтди, томонлар масофавий таълимни янада ривожлантириш, таълим сифатини мониторинг қилиш ва баҳолаш, инновацион таълим технологияларини қўллаган ҳолда ўқув жараёнини ташкил этиш масалаларини муҳокама қилдилар.