Фаолият якунларининг муҳокамаси

Бош прокуратура Академияси томонидан таълимнинг илғор усулларини татбиқ этиш ютуқлари ва натижаларини муҳокама қилиш учун майдон яратиш, тажриба алмашиш ва замонавий таҳдидларни ҳисобга олган ҳолда ҳуқуқни муҳофаза қилувчи соҳа мутахассисларини ўқиш жараёнини янада такомиллаштириш бўйича таклифларни ишлаб чиқиш мақсадида Академиянинг ташкил этилганлигининг 2 йиллиги муносабати билан бир қатор тадбирлар ўтказилди.

Хусусан, жорий йилнинг май ойида ўтказилган тадбирлар доирасида, “Юридик фан ва ҳуқуқни қўллаш амалиётининг долзарб муаммолари” мавзусидаги республика илмий-амалий видеоконференция, суд ва ҳуқуқни муҳофаза қилиш фаолияти соҳасида Илмий-тадқиқот консорциумининг йиғилиши, “Илмий-тадқиқот лойиҳалари танловида иштирок этишнинг долзарб вазифалари, имкониятлар ва истиқболли йўналишлар” мавзусидаги амалий видеоконференция, “Ёш олимлар минбари” шаклидаги республика илмий-амалий конференциялар ташкил этилди.

Туркум тадбирлар “Ҳуқуқни муҳофаза қилиш соҳасидаги таълим салоҳиятини ошириш: муаммо ва ечимлар” мавзусидаги халқаро илмий-амалий конференцияни ўтказиш билан якунланди. Унинг ишида илм-фан ва таълим соҳасидаги 170 дан зиёд хорижий ва миллий экспертлар, шунингдек 24 давлат ва 10 халқаро ташкилот, жумладан БМТ агентликлари, Жиноий даромадларни легаллаштириш ва терроризмни молиялаштиришга қарши курашиш Евросиё гуруҳи котибияти, Халқаро антикоррупция академияси, Жиноий даромадларни легаллаштириш ва терроризмни молиялаштиришга қарши курашиш бўйича халқаро тармоқ институти, Молиявий мониторинг бўйича халқаро ўқув-методик марказининг халқаро департаменти амалиётчилари иштирок этишди.

2020 йил 29 май куни Бош прокуратура Академияси Кенгашининг туркум тадбирлар натижалари муҳокамасига бағишланган навбатдаги мажлиси бўлиб ўтди.

Мажлис кун тартибига Академия ташкил этилганлигининг 2 йиллиги муносабати билан ўтказилган туркум тадбирлар якуни натижалари муҳокамасидан ташқари, Академиянинг таълим ва илмий-тадқиқот соҳаларидаги жорий фаолиятининг долзарб масалалари, охирги икки йил давомида эришилган натижалар ҳамда фаолиятни янада такомиллаштириш бўйича устувор вазифалар киритилди.

Мажлис давомида Ўзбекистон Республикаси Бош прокурори томонидан белгилаб берилган вазифалар ижроси юзасидан Академия ходимларини қуйи прокуратураларда ўтаган иш ўрганиш якунлари бўйича ҳисоботи эшитилди.

Бундан ташқари, Академия докторант ва мустақил изланувчилари илмий-тадқиқот фаолиятининг самарадорлиги мониторинги натижалари ҳамда мустақил изланувчиликка қабул қилиш бўйича ўтказилган суҳбат натижалари, уларнинг диссертация мавзулари ва илмий раҳбарлари тасдиқланди.

Алоҳида эътибор, коронавирус пандемияси шароитида Академия магистратурасида жорий ва якуний назоратни ҳамда якуний давлат аттестациясини ўтказиш масалаларига қаратилди.

Мажлисда Академия профессор-ўқитувчилари томонидан тайёрланган дарсликлар, ўқув-услубий қўлланмалар ва бошқа махсус адабиётлар нашрга тавсия этилди.