Халқаро ҳамкорлик доирасидаги учрашув

Германия Халқаро ҳамкорлик ташкилотининг (GIZ) “Марказий Осиёда ҳуқуқий давлатчиликка кўмаклашиш” минтақавий дастури доирасида “Маъмурий ҳуқуқнинг умумий принциплари” мавзусида онлайн режимда ўтказилган вебинарда Бош прокуратура Академиясининг профессор-ўқитувчилари ва магистрантлари ҳамкор ташкилот сифатида  иштирок этдилар.

Вебинар ишида халқаро ташкилотлар вакиллари, хорижий экспертлар, жумладан Латвия давлатидан Станислав Линкевич, Германиядан Йорг Пуделька, Қозоғистондан Алмат Габбасов ва бошқалар, миллий ҳамкор ташкилотлар сифатида Ўзбекистон  Республикаси Олий суди, Ўзбекистон Республикаси Судьялар олий кенгаши ҳузуридаги Судьялар олий мактаби,  Ўзбекистон Республикаси Адлия вазирлиги, Адвокатлар палатаси, Тошкент Давлат юридик университети ва бошқа бир қатор олий ўқув муассасаларининг вакиллари қатнашдилар.

Тадбирда мамлакатимизда амалга оширилаётган суд-ҳуқуқ ислоҳотлари шароитида маъмурий суд ишларини юритишда мутаносиблик, тингланиш имкониятининг мавжудлиги, қонунийлик ва бошқа принципларнинг қўлланилиши масалаларига оид миллий қонунчилик нормалари халқаро стандартлар билан боғлиқ ҳолда таҳлил этилиб,  хорижий давлатлар тажрибаси мисолида муҳокама қилинди.

Вебинар иштирокчилари ушбу масаладаги ҳамкорлик учрашувларини давом эттириш юзасидан фикр билдирдилар.

Навбатдаги ҳамкорлик учрашувлари жорий йилнинг 10 ҳамда 17 июль кунларига белгиланиб, ушбу тадбирларда маъмурий ҳуқуқнинг долзарб масалаларини муҳокама қилиш режалаштирилди.