Ўзбекистон Республикаси Бош прокуратураси Академияси магистратураси: биринчи йил сарҳисоби ва ривожланиш истиқболлари

Ўзбекистон Республикаси Бош прокуратураси Академияси магистратурасига 2020/2021 ўқув йили учун номзодлар қабули бошлаб юборилди (ҳужжатларни онлайн тарзда тақдим этиш https://new.proacademy.uz/uz-lat/login ҳаволаси орқали амалга оширилади).

Академия магистратурасига номзодларни қабул қилиш тенг ҳуқуқлилик, қабул ва танловнинг ягона қоидалари, шунингдек очиқлик ва шаффофлик асосида, субъективизм ва инсон омили асоссиз таъсирининг ҳар қандай кўринишларини истисно қилган ҳолда амалга оширилади.

Имтиҳон жараёнлари давлат органлари, олий таълим муассасалари, шунингдек, “Буюк келажак” ХННТ, “Юксалиш” умуммиллий ҳаракати, Ёшлар иттифоқи каби нодавлат нотижорат ташкилотлари вакилларининг холис кузатуви остида ўтказилади. Бутун имтиҳон жараёни ОАВ ва Академиянинг ижтимоий тармоқлардаги расмий саҳифалари орқали кенг жамоатчиликка ёритиб борилади.

Telegram: https://t.me/ProsecutorAcademy
Facebook: www.facebook.com/ProsecutorAcademy
Instagram: www.instagram.com/proacademyuz/
Twitter: www.twitter.com/ProAcademyUz

Магистратурага танлов “Юриспруденция” мутахассислиги бўйича олий юридик маълумотга эга бўлган шахслар (шу жумладан прокуратура органлари ва амалдаги кадрлар захирасидаги ходимлар) орасида ўтказилади. Шунингдек, бошқа таълим йўналишлари бўйича олий маълумотга ва бевосита прокуратура органларида камида 5 йиллик меҳнат стажига эга бўлган прокуратура органлари ходимлари танловда иштирок этиши мумкинлиги кўзда тутилган.

Академия магистратурасининг “Коррупцияга қарши курашиш”, “Прокурорлик фаолияти” ва “Тергов фаолияти” йўналишлари бўйича 30 та, шу жумладан давлат гранти бўйича – 18 та ва тўлов контракти асосида – 12 та қабул квотаси тасдиқланган бўлиб, улардан:

– прокуратура органлари ходимлари учун квота – 15 та (ҳар бир йўналиш бўйича 5 тадан);

– очиқ танлов бўйича квота – 15 та, шу жумладан давлат гранти асосида 3 та (ҳар бир йўналишда 1 тадан) ва тўлов контракти асосида 12 та.

Ўқишга қабул қилинган прокуратура органлари ходимларининг эгаллаб турган лавозими ва ўртача ойлик иш ҳақи ўқиш даври мобайнида сақлаб қолинса, очиқ танлов асосида қабул қилинган номзодларга қонун ҳужжатларида белгиланган тартиб ва миқдорда ҳар ойлик стипендия тўланади.

Академия магистратурасига кириш имтиҳонларини ташкил этиш ва ўтказиш жараёнлари инновацион ёндашув ҳамда замонавий ахборот-коммуникация технологияларидан фойдаланган ҳолда амалга оширилади.

Хусусан, номзодлар томонидан имтиҳон саволларини ўз ичига олган имтиҳон билетлари танлови билетлар рақамини автоматик генерация қилувчи Академия томонидан махсус ишлаб чиқилган дастур орқали амалга оширилади. Номзодларга индивидуал идентификация рақамлари берилади, имтиҳон натижалари эса тўлиқ шифрланади.

Магистратурага ўқишга қабул қилиш жараёнини юқори ташкилий савияда ўтказиш, адолатли танлов, холислик ва ошкораликни таъминлаш мақсадида Бош прокурор буйруғига асосан Академия ва прокуратура органлари ходимлари, юқори нуфузга эга бўлган ҳуқуқшунос олимлар ва суд-ҳуқуқ соҳаси вакилларидан ташкил топган комиссия ва эксперт гуруҳлари ташкил этилади.

Зарур ҳужжатлар, имтиҳонлар ўтказиш шакли, баҳолаш мезонлари ҳамда номзодларга қўйилган талаблар ҳақидаги маълумотлар Академиянинг расмий веб-сайти ва ижтимоий тармоқларида жойлаштириб борилади.

Барча номзодларга муносиб тайёргарлик кўришлари учун тенг имкониятларни яратиш ҳамда турли хил коррупциявий омилларни чеклаш мақсадида имтиҳон саволлари (топшириқлари) олдиндан Академиянинг расмий веб-сайтида жойлаштирилади.

Кириш имтиҳонларини ташкил этиш ва ўтказишда номзодлар билимини тўлиқ ва холисона баҳолашни таъминлаш, натижада энг муносиб ва иқтидорли тингловчиларни танлаб олишга устувор аҳамият берилади. Кириш имтиҳонлари ёзма имтиҳон ва суҳбатдан иборат бўлиб, бунда номзоднинг билим ва кўникмалари даражаси унинг ёзма ва оғзаки нутқ кўникмалари асосида баҳоланади.

Ёзма имтиҳон ҳуқуқий мавзуда эссе ва чет тили бўйича тест саволларидан иборат бўлади. Чет тили бўйича тегишли сертификатга эга бўлган номзодларга ушбу имтиҳон тури бўйича энг юқори балл берилиб, имтиҳон топширишдан озод қилинади.

Мутахассислик фанлари бўйича ёзма имтиҳон билетлари ҳуқуқшунослик фанлари (фуқаролик, жиноят, жиноят-процессуал, меҳнат ҳуқуқи ва бошқалар) бўйича эссе мавзуларидан иборат бўлади.

Шу билан бирга, номзодга таклиф этилган саволлар орасидан ўзига энг яқин бўлган мавзуни танлаш имконияти берилади, бу эса уларнинг қобилияти ва билимларини янада юқори даражада очиб беришга ёрдам беради.

Мутахассислик бўйича ёзма имтиҳондан муваффаққиятли ўтган номзодлар кириш имтиҳонларининг кейинги босқичи – суҳбатга киритиладилар.

Суҳбат жараёни, ёзма имтиҳон каби онлайн тарзда трансляция қилинади.

Чет тили, ёзма имтиҳон ва суҳбат натижаларига кўра энг юқори балл тўплаган номзодлар Академия магистратураси тингловчилари сафига қабул қилинади.

Бугунги кунда Академияда янгича фикрлайдиган, замонавий билим ва амалий кўникмаларни пухта эгаллаган ҳамда чуқур таҳлилий қобилиятга эга бўлган ёш авлод кадрларини тайёрлашга қаратилган зарур илмий-маърифий салоҳият шакллантирилган.

Магистратура мутахассисликлари бўйича кадрларни тайёрлашга қаратилган таълим жараёни улкан профессионал тажрибага эга бўлган Академиянинг профессор-ўқитувчилари таркиби ҳамда илғор миллий, хорижий ва халқаро экспертлардан иборат экспертлар жамоаси томонидан илғор инновацион дастурларга асосан назариянинг амалиёт билан уйғунлигини таъминлаган ҳолда олиб борилмоқда.

Академиядаги ўқув жараёнининг муҳим жиҳати шундаки, хорижий мамлакатларнинг давлат ва ҳуқуқни муҳофаза қилувчи органларида турли, шу жумладан раҳбарлик лавозимларда фаолият юритган, ўз соҳасининг тан олинган етук мутахассислари бўлган катта амалий тажрибага эга халқаро экспертлар ўқув машғулотларига узоқ муддатга жалб этиб борилади.

Масалан, бугунги кунда Академиянинг халқаро ҳамкорлари кўмагида “Коррупцияга қарши курашиш” мутахассислиги бўйича ўқув дастурлари Австриянинг Вена шаҳридаги Халқаро коррупцияга қарши курашиш академиясини кўп йиллар мобайнида бошқарган Мартин Кройтнер ва Словениянинг коррупцияга қарши комиссияси раҳбари сифатида хизмат қилган Горан Клеменчич каби жаҳон миқёсидаги экспертлар томонидан илғор халқаро стандартлар асосида такомиллаштирилмоқда.

Ўқув йили давомида юридик инглиз тили модули бўйича юридик ҳужжатларни тузиш, ёзма ва оғзаки нутқ қобилиятини шакллантиришга алоҳида эътибор қаратилади. Шу билан бирга, бу жараёнга тил соҳиблари бўлган – АҚШнинг Вашингтон университети профессори Патриссия Маклофлин ва АҚШнинг Виттенберг университети битирувчиси Мэдисон Крстич жалб этилди. Мазкур амалиётни янги ўқув йилида ҳам давом эттириш режалаштирилган.

Академиянинг суд жараёни, тергов-криминалистика ва тезкор қидирув жараёнларини имитация қилувчи махсус жиҳозланган ўқув хоналарида ўтказиладиган амалий ўқув машғулотлари тингловчилар томонидан ўзлаштирилган назарий билимларни қўллаш ҳамда зарур кўникма ва малакаларни шакллантиришга ёрдам беради ва шундай қилиб, амалиётга йўналтирилган learning by doing усули самарадорлигини намойиш этади.

Академия тингловчилари Бош прокуратура ва ҳудудий прокуратуралар органлари, хусусан секторлар фаолияти билан яқиндан танишиш, мурожаатларни кўриб чиқишда иштирок этиш ва фуқароларни бевосита қабул қилиш, воқеа жойларига чиқиш, тергов-процессуал ҳужжатларни расмийлаштиришда қатнашиш, криминалистика тактикаси ва техникасини ўзлаштириш имкониятига эга бўлади.

Шунингдек, талабалар учун дала ўқув машғулотлари ташкил этилиб, уларнинг кўламини кенгайтириш янги ўқув йилида ўқув жараёнини ташкил этишнинг устувор вазифаларидан бири этиб белгиланган.

Академияда хорижий давлат ва ҳуқуқни муҳофаза қилувчи органлар, миллий ва халқаро ташкилотлар вакилларини жалб қилган ҳолда маъруза ва ўқув-амалий машғулотларнинг ташкил этилиши, илғор миллий ва хорижий экспертлар томонидан машғулотларнинг ўтказилиши тингловчиларнинг билими ва дунёқарашини кенгайтириш орқали ҳозирги замон талабларига жавоб берадиган янги кадрларни шакллантиришга хизмат қилади.

Академияда тингловчиларнинг танқидий фикрлаш, масъулият, интизомга риоя қилиш, етакчилик, мулоқотга киришувчанлик каби шахсий сифатлари ва кўникмаларини ривожлантириш мақсадида психологларни жалб этган холда махсус машғулотлар ташкил этилади.

Академия академик мобиллик дастурларини фаол амалга оширмоқда.

Масалан, илгари эришилган келишувлар доирасида Академия магистратураси тингловчиси Швециянинг Лунд университетида иккинчи семестрида таҳсил олди. Янги 2020/2021 ўқув йилида эса академик мобилликни кенгайтириш кўзда тутилган, хусусан, Академия магистратураси тингловчиларининг икки нафарини Лунд университетида таҳсил олиши бўйича келишувга эришилди.

Академия кўмагида магистратура тингловчилари мунтазам равишда, жумладан, маърузачи сифатида, Австрия, Польша, Швеция, Қозоғистон, Қирғизистон ва бошқа мамлакатларда ўтказилган турли халқаро конференциялар, форумлар ва бошқа тадбирларда иштирок этдилар ва бу орқали катта тажриба орттирдилар.

Шунингдек, магистратура тингловчилари муҳим тадбирларни ўтказиш бўйича ташаббус билдириб келдилар.

БМТнинг Бола ҳуқуқлари тўғрисидаги Конвенцияси қабул қилинганлигининг 30 йиллигига бағишланган халқаро конференция

БМТнинг коррупцияга қарши Конвенциясини имплементация қилишга бағишланган Бирлашган Миллатлар Ташкилотининг Модели – амалий ўйин белгиларини мужассам этган конференция

Шу билан бир қаторда Япония халқаро ҳамкорлик агентлиги (JICA) томонидан таъсис этилган грант танловида Академия тингловчилари ва ходимлари орасидан таркиб топган ижодий жамоа ғолиб деб топилиб, уларни якунига кўра коррупцияга қарши кураш бўйича иккита лойиҳани амалга оширишга эришилди.

Магистратура тингловчиларининг илмий-тадқиқот фаолияти энг устувор йўналишлардан бири бўлиб, ўқув йили давомида диққат марказида бўлиб келмоқда.

Академия профессор-ўқитувчилари тингловчиларнинг илмий-тадқиқот фаолиятига илмий раҳбар ва илмий маслаҳатчи сифатида ҳамроҳлик қилса, Бош прокуратуранинг ходимлари амалиётдан маслаҳатчи сифатида уларга амалдаги қонунчилик ва ҳуқуқни қўллаш амалиётини такомиллаштириш бўйича аниқ таклифлар тайёрлашга, магистрлик ишининг прокуратура органлари амалий фаолияти билан узвий боғлиқлигини таъминлашга яқиндан кўмак берадилар.

Академияда ҳуқуқ-тартибот ва бошқа давлат идораларида хизмат қилишни танлаган иқтидорли ва ижодкор ҳуқуқшунослар учун юқори натижаларга эришиш ва касбий ўсишда зарур бўлган чуқур билим ва касбий кўникмаларни эгаллаши учун кенг имкониятлар ва илмий-маърифий муҳит яратилган.

Шундай қилиб, агар сиз қонунга хизмат қилиш йўлида таълим бериш ва ўқитиш мақсади бўлган етакчи мутахассислар орасида бўлишни истасангиз, унда бу илм даргоҳи сиз учун.

Сизларни Бош прокуратура Академиясида кутиб қоламиз.