Жиноят-ижроия қонунлигини такомиллаштириш юзасидан ўқув семинар ташкил этилди

2020 йилнинг 26 ноябрь куни Бош прокуратура Академияси томонидан БМТнинг Наркотик моддалар ва жиноят бошқармаси билан ҳамкорликда “Жиноят-ижроия қонунчилиги талабларининг ҳуқуқни қўллаш амалиётига тўғри татбиқ этилишини таъминлаш масалалари” мавзусида ўқув-семинар ташкил этилди.

Тадбирда Олий Мажлиснинг инсон ҳуқуқлари бўйича вакили (Омбудсман), Ички ишлар вазирлиги Жазони ижро этиш бош бошқармаси –Пробация хизмати ходимлари, шунингдек Бош прокуратура Академияси, Судьялар олий кенгаши ҳузуридаги Судьялар олий мактаби, Ички ишлар вазирлиги Академияси, ТДЮУ, ЖИДУ вакиллари ҳамда жиноят-ижроия қонунчилиги соҳасидаги Швеция, Украина ва Қозиғистондан хорижий экспертлар иштирок этдилар.

Семинар давомида пенитенциар тизими соҳасидаги халқаро стандартлар ва нормаларни инобатга олган ҳолда, Ўзбекистон Республикаси жиноят-ижроия қонунчилигини такомиллаштириш ҳамда озодликдан маҳрум қилиш билан боғлиқ бўлмаган жазоларни ижро этиш механизмларини қайта кўриб чиқиш, шартли ҳукм қилинган ва жазони ўташдан муддатидан илгари шартли озод қилинган шахсларнинг хулқ-атвори устидан назорат самарадорлигини ошириш масалалари муҳокама этилди.

Бундан ташқари, хорижий экспертлар П.Олссон, О.Филипец, К.Автухов, В.Човган ўз маърузаларида Европа Иттифоқи мамлакатларидаги пенитенциар муассасалар фаолиятининг ижобий тажрибаси, шунингдек маҳкумларни келажакда иш билан таъминлаш ва уларни ресоциализация қилишга доир дастурларнинг ўзига хос хусусиятлари ҳамда ушбу соҳадаги пробация хизматининг илғор амалиётига доир масалаларни ёритишди.      

Иштирокчилар томонидан умумэътироф этилган халқаро стандартларга мувофиқ маҳкумларнинг ҳуқуқлари доирасини янада кенгайтириш ва жазони ижро этиш муассасалари фаолияти устидан жамоатчилик назоратини кучайтириш, уларнинг озодликдан маҳрум этиш жойларидан озод этилган шахсларни ижтимоий мослаштиришда фуқаролик жамияти институтлари билан узвий ҳамкорлигини таъминлаш жиноий жазоларнинг ижроси соҳасидаги норматив-ҳуқуқий базани янада такомиллаштиришнинг устувор йўналишларидан ҳисобланиши таъкидланди.