“Марказий Осиё ва Шарқий Европа давлатлари олий таълим муассасаларида коррупцияга қарши курашиш соҳасида таълим” мавзусида халқаро онлайн конференция

2020 йил 3-4 декабрь кунлари Бош прокуратура Академиясида БМТнинг Гиёҳвандлик ва жиноятчилик бўйича бошқармаси (UNODC) ҳамкорлигида ҳамда Ўзбекистон Республикаси Коррупцияга қарши курашиш агентлиги кўмагида Халқаро коррупцияга қарши курашиш кунига бағишланган “Марказий Осиё ва Шарқий Европа давлатлари олий таълим муассасаларида коррупцияга қарши курашиш соҳасида таълим” мавзусидаги халқаро конференция ўтказилди.

Конференция жорий йилнинг 1-4 декабрь кунлари бўлиб ўтаётган UNODCнинг “Одил судлов учун таълим” (E4J) ташаббусининг мулоқотлар туркуми доирасида онлайн тарзда ташкил этилди.

Тадбирда 25 нафар хорижий ҳамда миллий таълим ва илмий-тадқиқот муассасаларининг 70 дан ортиқ вакиллари иштирок этишди.

Доҳа декларациясини сингдириш бўйича Глобал дастур координатори Марко Текшерия, E4J ташаббуси (олий таълим компоненти) координатори Бианка Копп, Ўзбекистон Республикаси Коррупцияга қарши курашиш агентлиги директорининг ўринбосари Т.Хайдаров ва Бош прокуратура Академияси бошлиғи ўринбосари У.Нигмаджанов ўз кириш сўзларида Барқарор ривожланиш мақсадларига эришишда таълимнинг, ҳусусан коррупцияга қарши кураш соҳасидаги таълимнинг муҳим роли ҳақида тўхталиб ўтишди.

Тадбир давомида иштирокчилар “Коррупцияга қарши курашиш”, “Ҳалоллик, тўғрилик ва ахлоқ нормалари” каби E4Jнинг унивеситет модуллари билан танишишди.

Тадбирда иштирок этган Aрманистон Республикаси Aдлия Академияси, Қозоғистон Республикаси Президенти ҳузуридаги Давлат бошқаруви Академияси, Москва давлат халқаро муносабатлар институти (Россия), Молдова Миллий Адлия институти, Миллий тадқиқот университети “Олий иқтисодиёт мактаби” (Россия), Миллий ва жаҳон иқтисодиёти университети (Болгария), Туриба университети (Латвия), Марказий Осиё Aмерика университети (Қирғизистон), UNODC, Халқаро коррупцияга қарши кураш академияси ҳамда бошқа ташкилотлар ва муссасаларнинг халқаро экспертлари коррупцияга қарши курашиш соҳасида ўқув модулларидан фойдаланиш бўйича ўз тажрибалари билан ўртоқлашдилар.

Икки кун давом этган конференция якуни бўйича иштирокчилар E4Jнинг университет модулларини амалиётда кенг қўллаш ва ривожлантириш, ушбу йўналишда минтақадаги таълим муассасаларининг саъй-ҳаракатларни бирлаштириш, халқаро ва идоралараро ҳамкорликни жадаллаштириш бўйича таклифлар билдириб ўтдилар.