БМТнинг коррупцияга қарши Конвенцияси иштирокчи давлатлари конференцияси модели

9 декабрь – Халқаро коррупцияга қарши курашиш кунини нишонлаш билан боғлиқ тадбирлар дастури доирасида Бош прокуратура Академиясида БМТнинг Гиёҳванд моддалар ва жиноятчилик бўйича бошқармаси Марказий Осиёдаги минтақавий ваколатхонаси кўмагида юридик соҳадаги олий ўқув юртлари магистратура тингловчилари ўртасида БМТнинг коррупцияга қарши Конвенцияси иштирокчи давлатлари конференцияси модели кўринишида “БМТнинг коррупцияга қарши конвенциясини амалга ошириш механизми: иккинчи босқич таҳлили” мавзусидаги тадбир бўлиб ўтди.

Ушбу тадбир коррупцияга қарши курашиш стратегияси ва амалиётини, коррупцияга қарши дипломатия ва коррупцияга тоқатсизлик маданиятини ривожлантириш соҳасидаги халқаро стандартларни тарғиб қилиш бўйича билим, кўникма ва малакаларни ривожлантиришга қаратилган.

Конференцияда коррупцияга қарши Конвенциянинг II боби қоидалари, уларнинг миллий қонунчиликка татбиқ этилиши, шунингдек, бир нечта хорижий давлатларнинг тажрибаси таҳлил ва муҳокама қилинди.

Конференцияда Бош прокуратура Академияси, Қорақалпоқ давлат университети, Тошкентдаги халқаро Вестминстер университети, Жаҳон иқтисодиёти ва дипломатия университети, шунингдек Тошкент давлат юридик университети магистратура тингловчилари иштирок этди.

Ушбу тадбирга БМТнинг Вена шаҳридаги Гиёҳванд моддалар  ва жиноятчилик бўйича бошқармаси Коррупция ва иқтисодий жиноятлар департаменти ходими В.Козин, шу бошқарма эксперти В.Нестеровайте мустақил экспертлар сифатида жалб қилинганлар.

Конференция икки босқичдан иборат бўлиб, рақобат руҳида ўтказилди, шу сабабли холисликни таъминлаш мақсадида иккала босқич вазифалари иштирокчилар ўртасида тасодифий танловни амалга оширувчи махсус электрон дастурдан фойдаланган ҳолда амалга оширилди.

Биринчи босқичда делегатлар Ўзбекистон Республикаси томонидан БМТнинг Коррупцияга қарши Конвенциясининг II боби 5, 7, 8, 9, 10-моддалари ижроси аҳволи юзасидан тақдимот қилдилар.

Тадбирнинг иккинчи босқичида иштирокчилар хорижий давлатлар (Австралия, Бельгия, Германия, Словения, Франция) нинг шартли вакиллари сифатида қатнашиб, мазкур давлатларда БМТнинг Коррупцияга қарши Конвенциясининг II боби ижроси таъминланиши аҳволи юзасидан тақдимотлар билан чиқдилар.

Иштирокчиларнинг чиқишлари якунида натижалар сарҳисоб қилинди ва жамоаларнинг ҳар бири баҳоланди.

Иштирокчилар Конвенциянинг мақсадлари ва вазифалари тўғрисида умумий хабардорликни ошириш, унинг бажарилиши юзасидан ҳисоботларни тайёрлаш, ҳисобот бериш бўйича амалий кўникма ва малакаларни ривожлантириш учун шунга ўхшаш академик лойиҳалар муҳимлигини таъкидладилар.