Уюшган жиноятчиликка қарши намунавий қонунчилик қоидаларининг янгиланган лойиҳасини тайёрлаш

Бош прокуратура Академияси бошлиғи ўринбосари БМТнинг Гиёҳванд моддалар ва жиноятчилик бўйича бошқармаси томонидан ташкил этилган Уюшган жиноятчиликка қарши намунавий қонунчилик қоидаларининг (2-нашр) янгиланган лойиҳасини тайёрлаш бўйича эксперт гуруҳи ишида иштирок этди.

БМТнинг Гиёҳванд моддалар ва жиноятчилик бўйича бошқармаси Шартномалар бўлими Уюшган жиноятчиликка қарши курашиш сектори ҳомийлигида ўтказилган тўрт кунлик виртуал учрашувда жиноятчиликнинг олдини олиш ва жиноий одил судлов, жиноий одил судлов, тезкор-қидирув фаолияти соҳасида халқаро ҳамкорлик ҳамда жиноятчиликка қарши курашишга оид бошқа масалалар бўйича турли ҳуқуқ тизимлари ва анъаналарни акс эттирувчи жиноятчиликка қарши курашиш соҳаси бўйича ихтисослашган етакчи илмий ва таълим муассасалари ҳамда турли мамлакатлар ҳуқуқни муҳофаза қилувчи органларининг  30 нафардан ортиқ экспертларни бирлаштирди.

Экспертлар биринчи нашри 2012 йилда чоп этилган ҳамда БМТнинг Трансмиллий уюшган жиноятчиликка қарши конвенцияси (Палермо конвенцияси) иштирокчилари бўлган мамлакатларга унинг имплементациясида ёрдам кўрсатишни назарда тутган Уюшган жиноятчиликка қарши намунавий қонунчилик қоидаларининг янгиланган таҳрири лойиҳасининг қоидаларини муҳокама қилишди.

Хусусан, Конвенциянинг умумий қоидалари, атамалар таърифлари, юрисдикция масалалари, Конвенция доирасида қамраб олинган алоҳида жиноятлар таркиби, тергов ва халқаро ҳамкорлик чоралари, мувофиқлаштириш ва жиноятларнинг олдини олиш, жабрланувчилар ва гувоҳларни ҳимоя қилиш, шунингдек судланганларни кўчириш каби масалалар кўриб чиқилди.

Уюшган жиноятчиликка қарши курашиш Секторининг дастур менежери доктор Риикка Путтонен экспертларга ҳамкорликдаги фаолият учун миннатдорчилик билдирди. Эксперт гуруҳи тўлдирилган версия лойиҳаси устида ишлашни масофадан туриб давом эттиради.