Халқаро илмий-амалий конференция тўғрисида ЭЪЛОН

Ўзбекистон Республикаси Бош прокуратураси Академияси “Хавфсиз йўл дастурий таъминотини ишлаб чиқиш” мавзусидаги инновацион лойиҳани амалга ошириш ва Япония халқаро ҳамкорлик агентлиги билан ҳамкорлик доирасида йўл ҳаракати хавфсизлигини таъминлаш соҳасидаги давлат бошқарувининг стратегик жиҳатларини аниқлаш, бу соҳадаги ҳуқуқбузарликларнинг профилактикасини амалга ошириш тизимини такомиллаштириш, қонунчилик ва ташкилий-институционал механизмлардаги мавжуд муаммо ва камчиликларни бартараф этишга қаратилган илмий асосланган таклиф ва тавсияларни ишлаб чиқиш мақсадида 2021 йил 3-4 март куни бўлиб ўтадиган “Йўл ҳаракати хавфсизлигини таъминлашнинг долзарб муаммолари ва бу соҳада ҳуқуқбузарликларнинг профилактикаси” мавзусидаги халқаро илмий-амалий конференцияга таклиф этади.

Мазкур тадбирда Ўзбекистон Республикаси Олий Мажлиси Қонунчилик палатаси ва Сенати, Вазирлар Маҳкамаси, манфаатдор вазирлик ва идоралар, ҳуқуқни муҳофаза қилувчи органлар ходимлари, миллий ва чет эл олий таълим ҳамда илмий-тадқиқот институтлари экспертлари, йўл ҳаракати хавфсизлигини таъминлаш ва бу борадаги ҳуқуқбузарликларни профилактика қилиш билан шуғулланувчи идоралар ходимлари, фуқаролик жамияти институтлари вакиллари ҳамда соҳадаги муаммолар билан шуғулланаётган тадқиқотчилар қатнашишлари мумкин.

Ҳуқуқ, иқтисод, ахборот-коммуникация технологиялари, социология ва техника фанларининг предмети бўлган йўл ҳаракати хавфсизлигини таъминлаш ва бу соҳада ҳуқуқбузарликларнинг профилактикаси масаласи комплекс хусусиятга эга эканлигини инобатга олиб, мазкур мавзу доирасида илмий тадқиқот олиб бораётган барча изланувчиларни илмий мақола ва тезислари билан иштирок этишга таклиф қиламиз.

Халқаро конференцияда ўзбек, рус ва инглиз тилларида қуйидаги асосий йўналишлар бўйича илмий мақола ва тезислар қабул қилинади:

1. Йўл ҳаракати хавфсизлигини таъминлашнинг ҳуқуқий муаммолари;
2. Йўл ҳаракати хавфсизлиги соҳасидаги ҳуқуқбузарликларни олдини олишдаги ташкилий-ҳуқуқий муаммолар;
3. Йўл ҳаракати хавфсизлигини ташкил этиш;
4. Йўл ҳаракати хавфсизлигини таъминлашда ахборот-коммуникация технологияларининг ўрни;
5. Йўл ҳаракати хавфсизлигини таъминлашнинг иқтисодиётдаги ўрни ва аҳамияти;
6. Йўл ҳаракати хавфсизлигини таъминлашнинг сиёсий жиҳатлари ва хусусиятлари;
7. Йўл ҳаракати хавфсизлигини таъминлашнинг ижтимоий-маданий ҳаётга таъсири;
8. Йўл ҳаракати хавфсизлигини таъминлаш ва соҳалараро тадқиқотларнинг истиқболлари.

Конференция якунлари бўйича тўплам нашр этиш кўзда тутилган. Мазкур тўпламда илмий мақола ва тезислар билан иштирок этиш учун қуйидаги келтирилган талабларга мувофиқ расмийлаштирилган илмий мақола ва тезисларни ўзбек, рус ёки инглиз тилларидан бирида жорий йилнинг
26 февралига қадар trafficsafety@proacademy.uz электрон манзили орқали юборишингиз сўралади.

Шунингдек, кенг жамоатчилик вакилларидан йўл ҳаракати хавфсизлигига оид таклифларини электрон манзил орқали юборишларини сўраймиз, улар Ўзбекистонда бу соҳадаги фаолиятни янада такомиллаштиришга самарали хизмат қилади.

Мақола ва тезисларнинг асосий шарти илова қилинади.

Иштирокчиларнинг конференцияда қатнашиш шакли ҳақида (онлайн ёки офлайн) Бош прокуратура Академиясининг расмий веб сайти ва ижтимоий тармоқлардаги саҳифалари орқали қўшимча равишда маълумот бериб борилади.

Конференция дастури жорий йилнинг 20 февралига қадар шакллантирилади.

Маълумот учун телефон: 71-202-04-96 (ички: 1775)

Тўпламда нашр этиладиган инглиз тилидаги мақолалар диссертациялар асосий натижаларини чоп этишга тавсия этилган илмий нашрлар рўйхатига киритилган хорижий илмий нашрларда чоп этилган илмий мақолаларга тенглаштирилади

МАҚОЛА ВА ТЕЗИСГА ҚЎЙИЛАДИГАН АСОСИЙ ТАЛАБЛАР:

1. Мақолада конференция йўналишларидан бири бўйича тизимли таҳлил ҳамда аниқ янги назарий ва амалий таклифлар акс этиши;
2. Матн такрорларсиз, мантиқий изчил, баён қилинган фикрлар аниқ, қисқа ва лўнда бўлиши;
3. Келтирилаётган маълумотлар ишончли ва тўғри бўлиши;
4. Мақолага тўпламда нашр қилиш мумкинлиги ҳақида шу соҳадаги етакчи олим ёки мутахассиснинг ёхуд муаллиф, тадқиқотчи фаолият юритадиган муассаса ёки унинг таркибий тузилмаси (кафедра) раҳбари тақризи;
5. Матн ўзбек, рус ёки инглиз тилларидан бирида тақдим этилиши;
6. Матн компьютерда Microsoft Word дастурининг Times New Roman шрифтида 14 катталикда 1,5 интервалда А4 форматли стандарт оқ қоғознинг бир томонида ёзилиши, электрон нусхада тақдим этилиши ҳамда матннинг чап қисми 3 см, ўнг қисми 1,5 см, тепа ва пастки қисмлари 2 см бўлиши;
7. Мақолада илмий баҳс-мунозара, иқтибосларнинг мавжуд бўлиши; иқтибослар 12 катталикдаги шрифтда 1,0 интервалда ёзилиши (иқтибослар тегишли бетнинг пастки қисмида келтирилиши);
8. Мақоланинг ҳажми 6 бетдан 12 бетгача, тезиснинг ҳажми 3-4 бет бўлиши;
9. Мақола ва тезиснинг биринчи саҳифасида муаллифнинг исм-шарифи, илмий даражаси ва унвони, иш жойи ва лавозими, яшаш ва хизмат манзили, телефон рақамлари ёзилиши;
10. Муаллифнинг исм-шарифи, илмий даражаси ва унвони (агар мавжуд бўлса), иш жойи ва лавозими, телефон рақамлари, мақоланинг номи, қисқача аннотация ҳамда таянч сўзлар ўзбек, рус ва инглиз тилида бўлиши шарт.

ИЗОҲ: Мақола ва тезислар электрон шаклда қабул қилинади. Мақола ёки тезиснинг конференциянинг қайси йўналишига тааллуқли эканлигини мақола ва тезис сарлавҳасида қўшимча кўрсатиб ўтиш лозим. Ушбу талабларга мувофиқ келмайдиган материаллар нашрга қабул қилинмайди ва муаллифга қайтарилмайди.

Батафсил маълумотлар учун Бош прокуратураси Академиясининг расмий веб сайти (www.proacademy.uz) ва ижтимоий тармоқлардаги расмий саҳифаларини (t.me/ProsecutorAcademy, www.facebook.com/ProsecutorAcademy, www.instagram.com/proacademyuz) кузатиб боринг.