Алишер Навоий таваллудининг 580 йиллиги муносабати билан маънавий-маърифий тадбир бўлиб ўтди

Буюк шоир ва мутафаккир, атоқли давлат ва жамоат арбоби Алишер Навоийнинг бебаҳо ижодий-илмий мероси нафақат халқимиз, балки жаҳон адабиёти тарихида, миллий маданиятимиз ва адабий-эстетик тафаккуримиз ривожида алоҳида ўрин тутади.

Алишер Навоий таваллудининг 580 йиллиги муносабати билан унинг асарларини Академия профессор-ўқитувчилари, докторантлари ҳамда магистратура тингловчилари ўртасида кенг тарғиб қилиш мақсадида Бош прокуратура Академиясида маънавий-маърифий тадбир ўтказилди.

Тадбирда Ўзбекистон Ёзувчилар уюшмаси аъзоси, шоира, таржимон Б.Холбекова ва “Ўзбекистонда хорижий тиллар” илмий-методик электрон журнали ва портали директори Г.Шукурова иштирок этиб, Алишер Навоийнинг бой ва серқирра ижодий мероси, ундаги ватанпарварлик ғоялари, инсонпарварлик ва адолатлилик тамойиллари борасида фикр юритдилар.

Шунингдек, Бош прокуратура Академияси профессор-ўқитувчилари, докторантлари ҳамда магистратура тингловчилари Алишер Навоий ғазаллари, рубоийларидан намуналар ижро этиб, Навоийнинг нафақат бой ижодий мероси, балки оқил ва адолатли давлат арбоби ва мутафаккир сифатидаги ўрнини эътироф этдилар.