Республика илмий-амалий конференцияси тўғрисида ЭЪЛОН

Ўзбекистон Республикаси Бош прокуратурасининг Академияси 2021 йил 9 апрель куни Илмий-тадқиқот консорциуми доирасида ўтказилиши режалаштирилган “Ёш олимлар минбари” рукнида “Юридик фан ва ҳуқуқни қўллаш амалиётининг долзарб муаммолари” мавзусида республика илмий-амалий видео-конференцияга таклиф этади.

Онлайн режимда бўлиб ўтадиган мазкур илмий-амалий конференцияда мамлакатимиздаги юридик олий ўқув юртларининг етакчи олимлари, профессор-ўқитувчилари, докторантлар ва мустақил изланувчилар, шунингдек юридик фан ва амалиётга алоқадор мутахассис ва экспертлар қатнашиши кутилмоқда.

Суд-ҳуқуқ мавзуси бўйича тадқиқот иши олиб бораётган барча изланувчиларни илмий мақола ва тезислари билан иштирок этишга таклиф қиламиз.

Конференция иши ўзбек, рус ва инглиз тилларида қуйидаги шўъбаларда олиб борилади:

1. Юридик фанларни ривожлантиришнинг назарий, амалий ҳамда ташкилий жиҳатлари ва унинг натижаларини амалиётга татбиқ этиш масалалари;
2. Давлат-ҳуқуқий фанларни ривожлантириш муаммолари;
3. Жиноят-ҳуқуқий фанларни ривожлантириш муаммолари;
4. Фуқаровий-ҳуқуқий фанларни ривожлантириш муаммолари.

Конференция якуни бўйича “Қонун устуворлигини таъминлаш ва суд-ҳуқуқ тизимини янада ислоҳ қилишнинг устувор йўналишлари” мавзусида тўплам нашр этилиши кўзда тутилган бўлиб, унда чоп этиш учун илмий мақола ва тезисларни жорий йилнинг 1 апрелга қадар 23042020@proacademy.uz электрон манзили ёки 97 768 33 22 телеграм рақамига юборишингиз сўралади (маълумот учун: тел.: 71-202-04-96 (ички 1791).

Мақола ва тезисларнинг асосий шарти илова қилинади. 

МАҚОЛАГА ҚЎЙИЛАДИГАН АСОСИЙ ТАЛАБЛАР:

1. Мақолада конференция секцияларидаги мавзулардан бири бўйича тизимли таҳлил ҳамда аниқ янги назарий ва амалий таклифлар акс этиши;
2. Матн такрорларсиз, мантиқий изчил, баён қилинган фикрлар аниқ, қисқа ва лўнда бўлиши;
3. Келтирилаётган маълумотлар ишончли ва тўғри бўлиши;
4. Мақолага тўпламда нашр қилиш мумкинлиги ҳақида шу соҳадаги етакчи олим ёки мутахассиснинг ёхуд муаллиф, тадқиқотчи фаолият юритадиган муассаса ёки унинг таркибий тузилмаси (кафедра) раҳбари тақризи;
5. Матн ўзбек, рус ёки инглиз тилларидан бирида тақдим этилиши;
6. Матн компьютерда Microsoft Word дастурининг Times New Roman шрифтида 14 катталикда 1,5 интервалда А4 форматли стандарт оқ қоғознинг бир томонида ёзилиши, электрон нусхада тақдим этилиши ҳамда матннинг чап қисми 3 см, ўнг қисми 1,5 см, тепа ва пастки қисмлари 2 см бўлиши;
7. Мақолада илмий баҳс-мунозара, иқтибосларнинг мавжуд бўлиши; иқтибослар 12 катталикдаги шрифтда 1,0 интервалда ёзилиши (иқтибослар тегишли бетнинг пастки қисмида келтирилиши);
8. Мақоланинг ҳажми 6 бетдан 12 бетгача, тезиснинг ҳажми 3-4 бет бўлиши;
9. Мақоланинг биринчи саҳифасида муаллифнинг исм-шарифи, илмий даражаси ва унвони, иш жойи ва лавозими, яшаш ва хизмат манзили, телефон рақамлари ёзилиши;
10. Ўзбек, рус ва инглиз тилидаги муаллифнинг исм-шарифи, илмий даражаси ва унвони (агар мавжуд бўлса), иш жойи ва лавозими, телефон рақамлари, мақоланинг номи, қисқача аннотация ҳамда таянч сўзлар бўлиши шарт.

ИЗОҲ: Мақолалар электрон шаклда қабул қилинади. Мақоланинг конференция қайси секциясига тааллуқли эканлигини мақола сарлавҳасида қўшимча кўрсатиб ўтиш лозим. Ушбу талабларга мувофиқ келмайдиган материаллар нашрга қабул қилинмайди ва муаллифга қайтарилмайди.

Батафсил маълумотлар учун Бош прокуратураси Академиясининг расмий веб сайти (www.proacademy.uz) ва ижтимоий тармоқлардаги расмий саҳифаларини (https://t.me/ProsecutorAcademy, www.facebook.com/ProsecutorAcademy, www.instagram.com/proacademyuz) кузатиб боринг.