Бош прокуратура Академияси магистратурасида ўқув жараёни ва маънавий-маърифий ишларнинг ўзаро боғлиқлиги

Академия магистратурасидаги кенг қамровли ўқув режаси билан бир қаторда, тингловчиларнинг маънавий савиясини, интеллектуал қобилиятини, миллий ва умуминсоний қадриятлар соҳасидаги кенг дунёқараши ва билимларини ривожлантириш мақсадида улар билан маънавий-маърифий ишлар тизимли равишда ташкил этилган.

Тингловчилар барча соҳаларда, шу жумладан суд-ҳуқуқ соҳасида ислоҳотларни ривожлантиришнинг муҳим йўналишларини белгилаб берган Ўзбекистон Республикаси Президентининг Олий Мажлисга Мурожаатномасини ўрганишни давом этдилар. Мурожаатномада илгари сурилган асосий ғоялар магистрлик диссертациялари доирасида амалга оширилаётган илмий-тадқиқот ишларини олиб бориш жараёнида муҳим аҳамият касб этади.

Қонунчилик фаолияти билан танишиш учун тингловчилар Ўзбекистон Республикаси Олий Мажлиси Сенатининг навбатдаги ялпи мажлисида қатнашдилар, унда Сенат фаолиятининг 2021 йилга мўлжалланган устувор йўналишлари билан боғлиқ маълумотлар билан танишдилар ва шу билан бирга, сайлов, жиноий ва жиноий-процессуал қонунчиликни такомиллаштириш, аудиторлик фаолияти ва бошқа соҳаларни тартибга солишга қаратилган қонун лойиҳаларини муҳокама қилиш жараёнини кузатдилар.

Тадбир магистратура тингловчиларига парламентнинг юқори палатаси фаолияти билан яқиндан танишиш, шунингдек ҳудудий маъмурий бирликлар манфаатларидан келиб чиққан ҳолда қонун лойиҳаларини муҳокама қилиш, шунингдек кенг жамоатчилик учун муҳим аҳамиятга эга бўлган масалаларни муҳокама этиш жараёнида иштирок этиш имконини берди.

Қонунчилик соҳасида талабаларнинг касбий маҳоратини ривожлантириш мақсадида Академия Олий Мажлис Сенати билан ушбу йўналишдаги ҳамкорликни давом эттириш тўғрисида келишувга эришди.

“Прокуратура органлари: келиб чиқиши, ривожланиш тарихи ҳамда давлат ва жамият ривожланишида тутган ўрни” мавзусидаги давра суҳбати доирасида тингловчилар прокуратура органларининг қонунлар ижроси устидан назорат фаолиятини ташкил этиш масалаларини бугунги кун талабидан келиб чиққан ҳолда ҳар томонлама кўриб чиқдилар. Муҳокамалар давомида прокуратура органларида амалий тажрибага эга бўлган магистратура тингловчилари ўз тажрибалари билан ўртоқлашганликлари тадбирнинг амалий аҳамиятини янада оширишга хизмат қилди.

Шунингдек, тадбир давомида мамлакатда қонунийлик ва ҳуқуқ-тартиботни таъминлашга қаратилган қонунлар ижроси устидан прокурор назорати институтининг шаклланиши ва ривожланиши тарихи жараёнлари тўғрисидаги Академия ходимлари томонидан тайёрланган ҳужжатли фильм намойиш этилди.

Назария ва амалиёт ўртасидаги узвийликни таъминлаш мақсадида тингловчиларнинг Олмазор, Шайхонтоҳур ва Юнусобод туманларидаги прокурорлар бошчилигидаги ҳудудларни комплекс ижтимоий-иқтисодий ривожлантириш бўйича секторларга ўқув ва амалий ташрифи ташкиллаштирилди. Тадбир давомида тингловчилар туман прокуратуралари ва секторлари фаолияти билан танишиб, фуқароларнинг мурожаатлари билан ишлаш ҳамда фуқароларга ҳуқуқий ёрдам кўрсатиш кўникмаларини шакллантириш мақсадида фуқароларни қабул қилиш жараёнида қатнашдилар.

Тингловчиларда китобхонлик маданиятини ривожлантириш мақсадида ҳар ой “Китобхонлик кечаси” тадбири ташкил этилиб, унинг доирасида тингловчилар томонидан ўқилган бадиий адабиётлар муҳокама қилиниб келинмоқда.

Ўзбекистон Республикаси Қуролли Кучлари тарихи ва ютуқлари билан яқиндан танишиш мақсадида Ўзбекистон Республикаси Қуролли Кучлари Давлат музейига ташриф уюштирилди. Ташриф давомида тингловчилар ҳарбий санъат экспозициялари, буюк аждодларимиз Амир Темур, Жалолиддин Мангуберди ва бошқаларнинг буюк юришлари билан боғлиқ кўргазмалар гувоҳи бўлдилар.

Магистратура тингловчилари Ўзбекистон Миллий агентлиги томонидан Ёшлар ижод саройида ташкил этилган “Мен террорчи эмасман” бадиий филмининг премьерасида ҳам қатнашдилар.

Бундан ташқари, тингловчилар Алишер Навоий номидаги Миллий кутобхонасига ҳам ташриф буюрдилар. Экскурсия давомида тингловчилар ўзларини қизиқтирган маълумотларни олиб, кутубхонанниг бой фонди, жиҳозланганлик даражаси билан танишиб, Академия магистратураси тингловчилари учун фойдаланиш имкони яратилган электрон ахборот-ресурс фонди имкониятлари юзасидан фикр алмашдилар.

Мазкур йўналишда ташкил этилган тизимли ишлар тингловчиларнинг зарур касбий ва шахсий хусусиятларини шакллантиришга ҳисса қўшиб, келажакда уларга касбий вазифаларини самарали ва сифатли бажаришга имкон беради.