Йўл ҳаракати хавфсизлигини таъминлашнинг долзарб муаммолари ва бу соҳада ҳуқуқбузарликларнинг профилактикаси мавзусидаги халқаро илмий-амалий конференция бўлиб ўтди

Жорий йил 3-4 март кунлари Бош прокуратура Академияси ва ИИВ Йўл ҳаракати хавфсизлиги бош бошқармаси томонидан Япония халқаро ҳамкорлик агентлиги билан ҳамкорликда Йўл ҳаракати хавфсизлигини таъминлашнинг долзарб муаммолари ва бу соҳада ҳуқуқбузарликларнинг профилактикаси мавзусидаги халқаро илмий-амалий конференция ташкил этилди.

Конференциядан кўзланган асосий мақсад йўл ҳаракати хавфсизлигини таъминлашда Япония тажрибаси билан яқиндан танишиш, бу соҳада Ўзбекистондаги мавжуд муаммоларнинг ечими бўйича таклифлар ишлаб чиқиш ҳамда Япония халқаро ҳамкорлик агентлиги кўмагида ушбу фаолиятимизни яхшилашга қаратилган йирик лойиҳаларни амалга оширишга оид истиқболли масалаларни муҳокама қилиш ҳисобланади.

Конференция 2 кун давом этиб, биринчи куни томонлар йўл ҳаракати хавфсизлигига оид умумий масалалар юзасидан фикр алмашган бўлсалар, иккинчи куни 3 та сессия доирасида йўл ҳаракати хавфсизлиги бўйича таълим, йўл ҳаракати хавфсизлигига оид қонунлар ижросини таъминлаш ҳамда йўл муҳандислигига оид мавзуларда амалий муҳокамалар тарзида давом этди.

Бутунжаҳон соғлиқни сақлаш ташкилоти маълумотларига кўра, ҳар йили қарийб 1,4 миллионга яқин одам йўл транспорт ҳодисалари қурбонига айланади. Ўзбекистонда биргина 2020 йилда мамлакатимизда 7 мингга яқин йўл-транспорт ҳодисалари содир этилган бўлиб, уларда 1 600 дан ортиқ одам вафот этган.

Ўзбекистонда йўл ҳаракати хавфсизлигини таъминлаш борасида ижобий ишлар амалга оширилаётган бўлишига қарамасдан, жорий ҳолат ушбу соҳадаги ишимизни такомиллаштириш, хорижий давлатларнинг илғор тажрибасини ўрганиш ва уни жорий этиш зарурлигини кўрсатади. Масалан, Японияда йўл-транспорт ҳодисалари статистикаси ва унинг оқибатида ҳалок бўлганлар сони камайиб бормоқда.

Шуни алоҳида қайд этиш жоизки, мамлакатда йўл ҳаракати хавфсизлигини таъминлашда прокуратура органлари ва Япония халқаро ҳамкорлик агентлиги ўртасида ҳам халқаро ҳамкорлик алоқалари сўнгги йилларда тобора ривожланиб бормоқда.

Масалан, бир гуруҳ ходимлар Японияда “Йўл ҳаракати хавфсизлиги” мавзусида ташкил этилган ўқув курсида муваффақиятли иштирок этди, ўтган давр мобайнида ўндан ортиқ ходимлар турли масалалар – жиноятчилик ва коррупцияга қарши курашиш, одил судлов ва бошқа йўналишларда ўқув курсларида ва Нагоя университети магистратурасида таҳсил олди.

Шу билан бирга, Япония халқаро ҳамкорлик агентлигининг мини грант лойиҳалари танловида ғолибликни қўлга киритиб, грант доирасида йўл ҳаракати хавфсизлиги қоидаларига риоя қилишга ундовчи қисқа метражли видеоролик тайёрланди. Мазкур ролик мана бир неча йилдирки барча марказий телеканаллар орқали намойиш этиб борилмоқда, интернетда эса роликка нисбатан дунёнинг турли бурчакларидан ҳанузгача жуда кўп ижобий шарҳлар келиб тушмоқда.

Бош прокуратура Академиясида жиноятларнинг содир этилиши сабабларини тизимли таҳлил қилиш ва ўрганиш маркази фаолият юритиб, ушбу марказ томонидан умумий жиноятчилик, шу жумладан йўл ҳаракати соҳасида содир этилаётган ҳуқуқбузарлик ва жиноятлар таҳлили ўтказилади. Ушбу марказ фаолиятига шу жумладан япониялик ҳамкорларимиз жалб қилинган.

Бундан ташқари, Бош прокуратура Академияси негизида илмий жамоа ташкил этилиб, Ўзбекистон Республикаси Инновацион ривожланиш вазирлигининг “Хавфсиз йўл дастурий таъминотини ишлаб чиқиш” мавзусидаги лойиҳаси доирасида автотранспорт воситаларини бошқариш ҳуқуқини берувчи гувоҳномани олиш жараёнини такомиллаштириш, ҳуқуқбузарлик ҳолатларини видеорегистраторлардаги сунъий интеллект ёрдамида қайд этиш ва уларга нисбатан чора кўриш ҳамда бошқа бир қатор йўналишларда амалий ишлар олиб борилмоқда. Илмий жамоа бу борада Ички ишлар вазирлигининг йўл ҳаракати хавфсизлиги бош бошқармаси билан яқиндан ишламоқда.

Ушбу конференцияда япониялик ҳамкорларимиз Ўзбекистон учун “Йўл ҳаракати хавфсизлигини таъминлаш” мавзусида алоҳида лойиҳани ишлаб чиқиш ва уни беғараз асосда амалга ошириш бўйича таклифларни кўриб чиқишларини маълум қилдилар.

Шу билан бирга, конференцияга ушбу соҳада тадқиқот ишларини олиб бораётган олимлар, тадқиқотчи ва амалиётчи ходимлар ҳам кенг жалб қилиниб, улар томонидан юборилган илмий мақолалар конференция материаллари билан биргаликда тўплам сифатида чоп этилди. Тўпламда мамлакатимизда йўл ҳаракати хавфсизлигини таъминлашга оид кенг жамоатчиликдан келиб тушган таклифлар ҳам ўрин олди.

Умид қиламизки, мазкур конференция Япония халқаро ҳамкорлик агентлиги билан келгусидаги кенг кўламли ҳамкорлигимиз учун самарали пойдевор бўлиб хизмат қилади. Япониялик дўстларимизнинг билим ва тажрибасини инобатга олган ҳолда, ҳеч шубҳасиз, Ўзбекистонда йўл ҳаракати хавфсизлиги соҳаси янада яхшиланишига ишонамиз.