Кибержиноятларни тергов қилиш бўйича малака ошириш курси ўтказилди

Бош прокуратура Aкадемияси томонидан прокуратура ва ички ишлар органлари ҳудудий органлари терговчилари иштирокида “Aхборот технологиялари соҳасидаги жиноятларни тергов қилиш масалалари” мавзусида малака ошириш курси ўтказилди.

Қисқа муддатли курс Давлатимиз раҳбари томонидан жорий йил 12 февраль куни Ички ишлар вазирлиги ҳайатининг кенгайтирилган йиғилиши давомида белгиланган вазифаларни амалга ошириш доирасида ташкил этилди.

Маърузачилар сифатида ўқув курсига кибержиноятларни тергов қилиш соҳасида кўп йиллик тажрибага эга бўлган Буюк Британиялик халқаро эксперт Ж. Блейк, шунингдек ИИВ Эксперт-криминалистика бош маркази, Ўзбекистон Республикаси Президенти ҳузуридаги Лойиҳа бошқаруви миллий агентлиги, “Киберхавфсизлик маркази” ДУК ҳамда Бош прокуратура Академияси мутахассисларидан иборат миллий экспертлар жалб қилинди.

Курс дастури кибержиноятчиликнинг асосий турлари ва уларнинг малакаси, тергов ҳаракатларини ўтказиш тактикаси, электрон далилларни қидириш ва олиб қўйиш, крипто-активларни аниқлаш ва олиб қўйиш, очиқ манбалардан маълумотларни қидириш (OSINT), TOR браузеридан фойдаланиш ва “Darkweb” интернетга кириш, кибержиноятларни тергов қилишда халқаро ҳамкорлик каби долзарб масалаларни ўз ичига олган.

Иштирокчилар курс давомида олган билимларини амалий вазифаларни ҳал қилишда қўллаб, кўриб чиқилаётган мавзулар бўйича фикр алмашдилар.

Курснинг амалий аҳамияти кибержиноятларга тезкор жавоб бериш ва тергов қилишнинг барча жиҳатларини – жиноят содир бўлган жойни кўздан кечиришни режалаштириш, тайёрлаш ва амалга оширишдан, рақамли далилларни сақлаш, шу жумладан маълумотларни сақлаш бўйича сўров юбориш (Facebook, Instagram) ва ўзаро ҳуқуқий ёрдам кўрсатиш кабиларни қамраб олганидан иборат.

Тадбир якунида иштирокчиларга курсни муваффақиятли якунлаганлик ҳақида сертификатлар топширилди.