Академия профессор-ўқитувчиларининг педагогик маҳоратини ошириш борасидаги изчил фаолият

Бош прокуратура Академияси томонидан ҳамкор илмий-методик ва таълим муассасалар вакиллари – малакали экспертларни жалб қилган ҳолда профессор-ўқитувчиларнинг педагогик маҳоратини ошириш бўйича тизимли ишлар амалга оширилиб келинмоқда.

Академиянинг электрон таълим бўлими катта прокурори, п.ф.ф.д. А.Ибраймов томонидан А.Авлоний номидаги илмий-тадқиқот институти кафедра доценти, п.ф.ф.д. Д.Хидоятова билан ҳамкорликда бир қатор тадбирлар ташкил этилиб, улар Академияда 2018 йилдан бошлаб жорий этилган электрон (масофавий) таълимнинг сифати ва самарадорлигини янада оширишга қаратилган.

Жумладан, “Масофавий ва аралаш малака ошириш курсларида педагогик дизайн моделлари” мавзусида интерактив тарзда ташкил этилган тренинг давомида педагогик дизайннинг ўзига хос хусусиятлари, масофавий ва аралаш малака ошириш курсларида педагогик дизайннинг ADDIE (Analysis, Design, Development, Implementation, Evaluation) моделини амалиётда қўллашнинг самарадорлиги атрофлича муҳокама қилинди.

“Масофавий ва аралаш ўқув курсларида тьюторлик фаолиятини ташкил этиш асослари” мавзусида навбатдаги тадбир вебинар шаклида ўтказилиб, тьюторлар фаолиятини самарали ташкил этиш борасидаги асосий масалаларни қамраб олди. Хусусан, тьютор функциялари, ўқитувчи ва тьютор орасидаги фарқлар, тьютор фаолиятини ташкил этиш тамойиллари, шунингдек мазкур соҳадаги халқаро ва миллий тажриба кўриб чиқилди.

Ўтказилган тадбирлар ўқув жараёнига илғор технологияларни жорий этиш ҳамда масофавий ва аралаш малака ошириш курслари сифати ва самарадорлигини оширишга хизмат қилади.