Жиноий даромадларни легаллаштиришга қарши кураш масалалари бўйича симуляция тренинги ташкил этилди

Академия томонидан БМТнинг Гиёҳвандлик ва жиноятчилик бўйича бошқармасининг Марказий Осиёдаги минтақавий ваколатхонаси билан ҳамкорликда АҚШнинг Ўзбекистондаги элчихонаси кўмагида Бош прокуратура Академиясида “Уюшган жиноятчилик ва гиёҳванд моддаларнинг ноқонуний муомаласи билан боғлиқ параллел молиявий терговни амалга ошириш ва ноқонуний молиявий оқимларга чек қўйиш” мавзусида симуляция тренинги ташкил этилди.

Тадбирнинг мақсади ҳуқуқни муҳофаза қилувчи органларининг тергов-тезкор ходимларининг параллел молиявий терговни амалга ошириш ва ноқонуний молиявий оқимларга чек қўйиш бўйича малакасини оширишдан иборат.

Тренинг давомида иштирокчилар гиёҳвандлик воситалари ёки психотроп моддалар билан қонунга хилоф равишда муомала қилиш билан боғлиқ жиноий ишлар доирасида параллел молиявий тергов ўтказишда халқаро амалиёт, амалга оширилиши зарур бўлган идоралараро ҳамкорлик ва бундай жиноятларни тергов қилиш давомида халқаро ташкилотларнинг тутган ўрни тўғрисида маълумот олдилар.

Мазкур жиноятлар билан боғлиқ ноқонуний молиявий оқимларни жиловлаш мақсадида ички ишлар органлари, прокуратура, Департамент, божхона органлари, Давлат хавфсизлик хизмати каби органларнинг ҳамкорликдаги фаолиятига алоҳида аҳамият қаратилди.

Тренинг амалий характерга эга бўлгани боис, тадбир давомида иштирокчилар томонидан олдиндан тайёрланган жиноят иши макети асосида тегишли тергов ҳаракатлари амалга оширилди (тинтув, далилларни тўплаш ва кўздан кечириш, сўроқ қилиш ва бошқалар), процессуал ҳужжатлар тайёрланди ҳамда тергов натижаларига кўра айблов хулосаси ва схемалар тайёрланиб, имтиҳон комиссиясига тақдим этилди.

Симуляция тренингида тортишувчанликни таъминлаш мақсадида иштирокчилар турли давлат органлари вакилларидан иборат гуруҳларга бўлинди.

Тадбир якуни бўйича иштирокчиларга сертификатлар берилди.

Ҳуқуқни муҳофаза қилувчи орган ходимларининг параллел молиявий текширувни амалга ошириш ва ноқонуний молиявий оқимларга чек қўйиш бўйича малакасини оширишилиши жорий йилда Евроосиё гуруҳи (ЕАГ) томонидан республикамизнинг ФАТФ тавсияларига мувофиқлигини ўзаро баҳолаш жараёни арафасида ўтказилиши фойдали бўлди.