“Замонавий юридик фан ва таълим: долзарб муаммолар ва уларни ҳал этиш йўллари” мавзусида халқаро илмий-амалий конференция

2021 йил 27-28 май кунлари Ўзбекистон Республикаси Бош прокуратураси Академияси ташкил этилганлигининг 3 йиллигига бағишланган “Замонавий юридик фан ва таълим: долзарб муаммолар ва уларни ҳал этиш йўллари” мавзусида халқаро илмий-амалий онлайн конференция ташкил этилди.

Конференция мақсади таълим жараёнида инновацион ёндашувларни муҳокама қилиш, замонавий таҳдидларни инобатга олган ҳолда ҳуқуқни муҳофаза қилиш соҳаси кадрларини тайёрлаш борасида тажриба алмашиш, коррупцияга қарши курашиш, жиноий даромадларни легаллаштириш ва терроризмни молиялаштиришга қарши курашиш, шунингдек инсон ҳуқуқларини таъминлаш соҳаларида халқаро стандартларни имплементация қилиш бўйича тавсиялар ишлаб чиқишдан иборат.

Тадбир Европада хавфсизлик ва ҳамкорлик ташкилоти, БМТнинг Гиёҳвандлик ва жиноятчилик бўйича бошқармаси, БМТнинг Инсон ҳуқуқлари бўйича Олий комиссари Бошқармаси ҳамда “Минтақавий мулоқот” ХННТ кўмагида ташкил этилди.

Анжуман ялпи ва тематик сессиялар шаклида ташкил этилган бўлиб, тадбирнинг биринчи куни замонавий шароитда таълим жараёнини ташкил қилишдаги муаммолар, юридик фан ва ҳуқуқни қўллашнинг долзарб муаммолари, тергов фаолиятининг долзарб масалалари ва ривожланиш истиқболлари муҳокама қилинди.

Сессияларда илм-фан ва таълим соҳасидаги 250 дан зиёд хорижий ва миллий экспертлар, шунингдек 20 дан ортиқ давлат ва 10 халқаро ташкилот вакиллари иштирок этишди.

Тадбирни кириш сўзи билан очган Ўзбекистон Республикаси Бош прокурори ўринбосари Э.Т.Юлдашев ҳамда Ўзбекистон Республикаси Олий Мажлиси Қонунчилик палатаси Спикерининг биринчи ўрибосари, Инсон ҳуқуқлари бўйича Ўзбекистон Республикаси Миллий маркази директори, академик А.Х.Саидов Академия томонидан ўтган давр ичида эришилган ижобий натижаларга тўхталиб, истиқболдаги вазифаларни алоҳида таъкидлаб ўтдилар.

Конференцияни ташкил этишда яқиндан ҳамкорлик қилган ЕХҲТнинг Ўзбекистондаги лойиҳалари мувофиқлаштирувчиси, Элчи Пьер фон Аркс, “Минтақавий диалог” ХННТ ташкилотининг Ўзбекистондаги филиали раҳбари Петра Горьюп Академия жамоасини қутлаб, трасмиллий уюшган жиноятчилик ва коррупцияга қарши курашиш, инсон ҳуқуқларини таъминлаш ва бошқа муҳим йўналишларда ҳамкорликдаги лойиҳаларни амалга оширишни келгусида давом эттиришга тайёрликларини билдирдилар.

Ҳамкорлар Академиянинг касбий юридик таълимни ривожлантириш, инновацион таълим ва рақамли технологияларни жорий этиш, фан ва таълимнинг юқори сифат стандартларига эришиш борасидаги ташаббусларини қўллаб қувватлаш мақсадида эканликларини таъкидлашди.

Конференцияда Германия Адлия академияси директори Ш.Ягги, Франция магистратура мактаби директорининг ўринбосари Э.Ренар, Россия Федерацияси Тергов қўмитасининг Санкт-Петербург академияси ректори А.Ефремов, Туркия Республикасининг Адлия академияси президенти М.Уздемир, Беларусь Республикаси Тергов қўмитаси Малака ошириш ва қайта тайёрлаш институти бошлиғи Ю.Каменецкий, Жиноий фаолиятдан топилган даромадларни легаллаштириш и терроризмни молиялаштиришга қарши курашиш бўйича халқаро тармоқ институтининг директори В.Овчинников, Қозоғистон Республикаси Бош прокуратураси ҳузуридаги Ҳуқуқни муҳофаза қилиш органлари академияси ректори Т.Сулейменов, Жиноий фаолиятдан олинган даромадларни легаллаштиришга ва терроризмни молиялаштиришга қарши курашиш бўйича Евроосиё гуруҳининг Ижроия котиби С.Тетеруков, Европа Кенгаши Жиноятчиликка қарши курашиш департаментининг Иқтисодий жиноятчиликка қарши курашиш бошқармаси бошлиғи М.Ферати, Япония Адлия вазирлигининг Тадқиқотлар ва малака ошириш институти Халқаро ҳамкорлик бошқармаси директори Т.Моринага, Швециянинг Лунд университети Ҳуқуқ социологияси департаменти бошлиғи И.Шульц, Германия халқаро ҳуқуқий ҳамкорлик жамғармасининг марказий Осиёдаги лойиҳалари раҳбари А.Шмайнк ва бошқа ташкилот ва муассасалар раҳбар ва ходимлари маъруза билан иштирок этди.

Ўтказилган ялпи йиғилиш ва тематик сессиялар натижаларига кўра, конференциянинг ҳуқуқни муҳофаза қилиш соҳасидаги илмий ва таълим салоҳиятини ошириш, идоралараро ва халқаро ҳамкорликни мустаҳкамлашга қаратилган амалий тавсиялари қабул қилинди.

Конференция иши 28 май куни ҳуқуқни муҳофаза қилувчи органлар фаолиятида инсон ҳуқуқларини таъминлаш, коррупцияга қарши стандартларни имплементация этиш, шунингдек жиноий даромадларни легаллаштиришга қарши курашиш, терроризмни молиялаштириш ва жиноий активларни тиклаш масалаларига бағишланган параллел сессиялар доирасида давом этади.