Бош прокуратура Академияси магистратурасига ўқишга кирмоқчи бўлган номзодлар учун онлайн консультация ўтказилди

Консультация давомида номзодларга кириш имтиҳонлари, Академия магистратурасида ўқиш ва илмий-тадқиқот ишини олиб боришнинг ўзига хос хусусиятлари тўғрисида батафсил маълумот берилди.

Академия магистратурасида жорий ўқув йилида таҳсил олиш учун жами 323 нафар номзодлар (шундан ташқи номзодлар – 220 нафар) ҳужжат топширган бўлиб, айрим мутахассисликлар бўйича битта ўринга номзодлар сони 13 нафарни ташкил этади. Дастлабки босқичда ички номзодларнинг имтиҳонларда иштироки масаласи прокуратура органлари аттестация комиссияларида кўриб чиқилди.

Кириш имтиҳонлари ёзма имтиҳон ва суҳбатдан ташкил топади. Ёзма имтиҳон ҳуқуқий мавзуда эссе ва чет тили бўйича тест саволларидан иборат.

Имтиҳонни ўтказишда янгича ёндашувлар жорий этилмоқда. Хусусан, мутахассислик фанлари бўйича ёзма имтиҳоннинг янада шаффоф ва холис бўлиши ҳамда бу борада номзодларга тенг имкониятларни яратиш мақсадида номзодлар орасидан танланадиган вакил томонидан битта билет танлаб олиниши ва барча номзодлар ушбу билетдаги 4 та саволдан биттасига жавоб ёзиши белгиланмоқда. Ушбу тартиб хорижий давлатларнинг нуфузли олий таълим муассасаларида кенг қўлланилиб келинаётганлиги аҳамиятлидир.

Имтиҳон ўтказиладиган жойга киришдан олдин номзодларнинг тана ҳарорати ўлчаниб, ҳар бир номзод алоҳида тиббий қўлқоп ва ниқоб ҳамда сув билан таъминланади, уларга керакли канцелярия товарлари берилади.

Ёзма имтиҳон ўтказиладиган вақт ва жой. Чет тили бўйича имтиҳон ва ҳуқуқий мавзуда эссе 29 август куни Тошкент шаҳри, Юнусобод тумани, Боғишамол кўчасида жойлашган “Ботаника” боғи ҳудудидаги ёпиқ саҳна майдонида ўтказилади. Имтиҳон соат 08:00 да бошланади. Номзодлар имтиҳон бошланишидан 30 дақиқа олдин имтиҳон ўтказиладиган жойга етиб келишлари шарт.

Кириш имтиҳонлари ўтказиладиган куни куннинг биринчи ярмида дастлаб чет тили бўйича, кейин эса мутахассислик фанлари бўйича имтиҳон ўтказилади.

Кириш имтиҳонларини топшириш учун номзодлар шахсини тасдиқловчи ҳужжатлар билан белгиланган вақт ва жойга келишлари лозим.

Белгиланган вақтдан кеч қолган номзодлар имтиҳонга киритилмайди, шунингдек келмаган номзодлар учун қўшимча имтиҳон ўтказилмайди ва бундай номзодларга тегишли имтиҳон учун “0” балл қўйилади.

Имтиҳон куни тана ҳарорати юқори бўлган номзодларнинг имтиҳонда иштироки масаласи тиббиёт ходимлари хулосасига биноан ҳал этилади.

Имтиҳон куни ўқув адабиёти, луғат, маълумотнома, жадвал, конспект, ёзув дафтари, қоғоз ёки электрон шаклдаги шпаргалкалар, норматив-ҳуқуқий ҳужжатлар, алоқа воситалари, аудио, фото ва видео ёзиш қурилмаларидан фойдаланиш тақиқланади.

Ушбу нарсалар аниқланган тақдирда номзод имтиҳондан четлаштирилади.

Чет тили бўйича ёзма имтиҳон 40 та саволдан иборат бўлиб, 2 қисмга бўлинади:

– 1-бўлим: ўқиш (20 та савол), ҳар бир тўғри жавоб учун 1,5 балл берилади;

– 2-бўлим: лексик ва грамматик компетенциялар (20 та савол), ҳар бир тўғри жавоб учун 1 балл берилади.

Тестни бажариш учун 1 соат 20 дақиқа, жавобларни жавоб варақасига кўчириш учун 10 дақиқа, жами 1 соат 30 дақиқа вақт ажратилади.

B2 ва ундан юқори даражадаги миллий сертификат ёки халқаро сертификатни тақдим этган 38 нафар номзодларга чет тилидан имтиҳонларсиз максимал балл берилади.

Ёзма имтиҳонда номзоддан ҳуқуқий мавзуда 1 та эссе ёзиш талаб этилади ва бунга 2 соат вақт ажратилади. Эссе жавоби 100 баллик тизимда баҳоланади.

Эссе натижаларига кўра 56 ва ундан юқори балл тўплаган номзодлар кириш имтиҳонларининг кейинги босқичи – суҳбатга киритилади.

Суҳбат саволлари мутахассислик фанларидан тузилган бўлиб, ҳар бир билет 8 та саволни ўз ичига олади, шу билан бирга, номзодга 3 та саволга жавоб бериш имконияти берилади. Суҳбат натижалари 100 баллик тизимда баҳоланади.

Ёзма имтиҳон ва суҳбат натижаларидан норози бўлган номзодлар Академия расмий веб-сайтида жавоблар эълон қилинган кундан бошлаб икки иш куни давомида апелляция комиссиясига Академиянинг расмий электрон почтаси info@procademy.uz орқали шикоят бериш ҳуқуқига эга.

Шикоятлар апелляция комиссияси томонидан икки иш куни ичида кўриб чиқилади ва натижаси ҳақида номзоднинг электрон почтасига хабарнома юборилади.

Имтиҳон жараёнлари давлат органлари, олий таълим муассасалари, шунингдек нодавлат нотижорат ташкилотлари вакилларининг холис кузатуви остида ўтказилади. Бутун имтиҳон жараёни ОАВ ва Академиянинг ижтимоий тармоқлардаги расмий саҳифалари орқали кенг жамоатчиликка ёритиб борилади.