“Ҳуқуқни муҳофаза қилиш фаолиятида фан ва таълимнинг долзарб масалалари” параллел сессияси якунлари

Ўзбекистон Республикаси Ҳуқуқни муҳофаза қилиш академиясида “Рaқaмли трaнсформaция дaвридa ҳуқуқни муҳофaзa қилиш соҳaсидaги зaмонaвий чaқириқ вa тaҳдидлaр” мaвзусидaги хaлқaро илмий-aмaлий конференция доирасида “Ҳуқуқни муҳофаза қилиш фаолиятида фан ва таълимнинг долзарб масалалари” параллел сессияси бўлиб ўтди.

Параллел сессиянинг мақсади — ҳуқуқни муҳофаза қилиш фаолиятида таълим ва илм-фаннинг ўрнини чуқур таҳлил қилиш, кадрлар тайёрлаш сифатини оширишнинг инновацион йўлларини муҳокама қилиш ва рақамли трансформация даврида вужудга келаётган янги таҳдидлар ва имкониятларга муносиб ечимлар ишлаб чиқишдан иборат бўлди.

Бу жараёнда ҳуқуқни муҳофаза қилувчи органларнинг халқаро тажриба билан боғлиқ билимларини бойитиш, тизимдаги амалиёт ва назария ўртасидаги алоқани мустаҳкамлаш, шунингдек, замонавий таълим платформалари ва технологиялари воситасида ҳуқуқий билимларни самарали узатиш усуллари асосий эътибор марказида бўлди.

Сессияда 10 дан зиёд давлатдан 50 га яқин ҳуқуқшунос олимлар, жумладан, ҳуқуқни муҳофаза қилиш фаолиятида фан ва таълим соҳасида Ўзбекистон, Туркия, Буюк Британия, Қозоғистон, Россия Федерацияси, Қирғизистон, Швеция, Беларусия, Тожикистон Республикасининг суд-тергов амалиёти ва таълим соҳасидаги мутахассислар иштирок этди. Улар орасида қуйидагиларни алоҳида таъкидлаш мумкин: Бекир Алтун – Туркия адлия академияси президенти, Мацкевич Игор Михайлович – Россия Федерация прокуратураси университети ректори, Овчинников Владимир Василевич – Жиноий фаолиятдан олинган даромадларни легаллаштиришга ва терроризмни молиялаштиришга қарши курашиш бўйича Халқаро тармоқ институти директори ва бошқа хорижлик мутахассислар.

Ўзбекистон Республикаси Олий суди, Бош прокуратураси, Ички ишлар вазирлиги ва бошқа ҳуқуқни муҳофаза қилувчи органлар вакиллари ҳамда миллий олимлар қатнашди.

Сессияда қуйидаги йўналишлар бўйича илмий маърузаларга кенг эътибор қаратилди. Хусусан, рақамли технологияларнинг ҳуқуқни муҳофаза қилиш фаолиятига таъсири, Ҳуқуқни муҳофаза қилувчи органлар фаолиятида таълим тизимини рақамлаштириш, жумладан, модулли ва масофавий таълим тизимлари, электрон таълим платформаларининг самарадорлиги, таълим ва амалиёт ўртасидаги интеграция механизмлари, академик таълим ва хизмат амалиётини уйғунлаштириш, халқаро аккредитация ва ҳуқуқий таълим стандартлари, илмий тадқиқотлар орқали соҳани ривожлантириш, илмий-амалий лойиҳаларда академик муассасалар ва амалиётчи органлар ҳамкорлиги, юридик фан ва унинг бошқа соҳаларини ривожлантириш масалалари, инсон ҳуқуқлари ва рақамли технологиялар ўртасидаги мувозанат масалалари.

Тадбир давомида Инсон ҳуқуқлари бўйича Ўзбекистон Республикаси Миллий маркази ва Ҳуқуқни муҳофаза қилиш академияси ўртасида ҳамкорлик меморандуми имзоланди.

Мазкур параллел сессия нафақат ҳуқуқни муҳофаза қилиш соҳасида таълим ва фаннинг жорий ҳолатини баҳолашга, балки унинг келажакдаги устувор йўналишларини белгилашга хизмат қилди.

Тадбир иштирокчилари орасида тузилган халқаро алоқалар, келгусида қўшма илмий лойиҳаларга асос бўлиши кутилмоқда. Шунингдек, сессия материаллари асосида махсус конференция материаллар тўплами тайёрланмоқда.