Ўзбекистон Республикаси Ҳуқуқни муҳофаза қилиш академиясида Ўзбекистон ҳуқуқни муҳофаза қилиш органларининг Қўл жанги федерацияси делегациясининг танишув ташрифи бўлиб ўтди.
Ташриф доирасида томонлар ўртасида ишчи учрашув ташкил этилди. Учрашувда талаба, тингловчи ва ходимларни жисмонан соғлом ва баркамол этиб тарбиялаш, уларнинг бўш вақтларини мазмунли ташкил этиш, жисмоний тарбия ва оммавий спорт турлари билан мунтазам шуғулланишлари учун зарур шарт-шароитлар яратиш масалалари муҳокама қилинди.
Шунингдек, “Қўл жанги” спорт тури бўйича аниқ ўқув ва амалий дастурларни жорий этиш, мазкур йўналишда тарғибот-ташвиқот ишларини кучайтириш истиқболларига алоҳида эътибор қаратилди.
Музокаралар жараёнида Академияда “Қўл жанги” бўйича тўгарак ва секциялар фаолиятини йўлга қўйиш, юқори натижаларга эришган спортчилар билан учрашувлар ташкил этиш, талаба, тингловчи ва ходимларни кенг жалб қилиш ҳамда улар ўртасида турли спорт мусобақаларини ўтказиш масалалари муҳокама қилинди.
Учрашув якунида Ўзбекистон Республикаси Ҳуқуқни муҳофаза қилиш академияси ҳамда Ўзбекистон ҳуқуқни муҳофаза қилиш органларининг Қўл жанги федерацияси ўртасида ҳамкорлик тўғрисидаги меморандум имзоланди.
Мазкур ҳужжат томонлар ўртасида ўзаро ҳамкорликни янада кенгайтириш, жисмоний тарбия ва спорт соҳасида қўшма амалий чора-тадбирларни изчил амалга ошириш, шунингдек соғлом турмуш тарзини тарғиб этишга хизмат қиладиган мустаҳкам ҳуқуқий асос яратади.