Академия изчил равишда ёшлар ўртасида экологик маданиятни шакллантириш, фаол фуқаролик позициясини ривожлантириш ҳамда соғлом турмуш тарзи қадриятларини тарғиб этишга қаратилган комплекс ташаббусларни амалга оширмоқда.
Дам олиш кунлари Ҳуқуқни муҳофаза қилиш академияси талабалари ташаббуси билан ташкил этилган «Academic Plogging» экологик ҳаракати доирасида Юнусобод туманида навбатдаги плоггинг экологик акцияси ўтказилди.
Плоггинг – бу жисмоний фаоллик ва атроф-муҳит ҳимоясини уйғунлаштирувчи экологик фаолият тури бўлиб, унда иштирокчилар югуриш (ёки юриш) жараёнида чиқиндиларни йиғадилар.
Мазкур тадбир атроф-муҳитни муҳофаза қилиш, экологик маданиятни юксалтириш, ёшлар ўртасида фаол фуқаролик позициясини шакллантириш, шунингдек соғлом турмуш тарзини тарғиб этишга қаратилди. Плоггинг формати жисмоний фаоллик ва жамоат манфаатига хизмат қилувчи фаолият уйғунлигини таъминлади.
Иштирокчилар 3,75 километр масофани босиб ўтиб, йўналиш бўйлаб ҳудудларни маиший чиқиндилардан тозалаш ишларини амалга оширдилар. Акцияда Академия ходимлари ва талабалари, бошқа олий таълим муассасалари вакиллари, фаол фуқаролар ва хорижий волонтёрлар иштирок этдилар. Жами 60 нафардан зиёд волонтёрлар томонидан 100 дан ортиқ чиқинди қоплари, жумладан пластик маҳсулотлар йиғиб олинди.
Ўтказилган акция атроф-муҳитга нисбатан масъулиятли муносабатни шакллантириш, жамоат ҳудудларига эҳтиёткорона муносабат маданиятини ривожлантириш ҳамда жамоавий ташаббус ва ҳамкорлик кўникмаларини мустаҳкамлашда ижобий натижаларни намоён этди.
Тадбир якунида иштирокчиларга Академия раҳбарияти томонидан тайёрланган эсдалик совғалари топширилди.
Академия ва «Academic Plogging» ҳаракати бундан буён ҳам шундай ташаббусларни тизимли равишда амалга ошириш, атроф-муҳитга масъулиятли муносабат маданиятини шакллантириш ва фуқароларни уни асрашга фаол жалб этишни мақсад қилган.