Ўзбекистон Республикаси Бош прокуратураси ва Ҳуқуқни муҳофаза қилиш академияси делегациясининг Буюк Британияга амалий ташрифи давом этмоқда. Манчестер Қироллик судида делегация аъзолари жиноят ишларини кўриб чиқиш тартиби ва суд жараёнини ташкил этиш билан танишдилар.

Делегация гувоҳларни қўллаб-қувватлаш хизмати – Victim Support ташкилоти томонидан юритиладиган Witness Service фаолиятини ўрганди. Ушбу хизмат суд жараёни иштирокчиларига, жумладан, судда кўрсатув берувчи гувоҳлар ва жабрланувчиларга бепул ҳамда мустақил амалий ва руҳий ёрдам кўрсатади.

Шунингдек, судья Патрик Филд билан учрашув бўлиб ўтди. У делегация аъзоларига Буюк Британия суд тизими ва Англия ҳамда Уэльсда жиноят ишларини кўриб чиқиш тартиби ҳақида маълумот берди.

Ташриф иштирокчилари терроризмга оид иш бўйича суд мажлисини кузатдилар, шунингдек, одам савдосида айбдор деб топилган шахсларга нисбатан ҳукм эълон қилиниши ва жазо тайинланишида қатнашдилар. Амалий дастур делегацияга суд фаолияти, гувоҳлар ва жабрланувчиларни қўллаб-қувватлаш ҳамда турли тоифадаги жиноят ишларини кўриб чиқиш амалиёти билан бевосита танишиш имконини берди.