Ўзбекистон Республикаси Ҳуқуқни муҳофаза қилиш академияси таянч докторанти Богдан Олегович Юматовнинг монографияси «Legal Order» халқаро танловининг «Энг яхши монография» номинациясида иккинчи ўринга сазовор бўлди.
Танлов Қозоғистон Республикаси Бош прокуратураси ҳузуридаги Ҳуқуқни муҳофаза қилиш органлари академияси томонидан ҳуқуқ-тартибот соҳасидаги энг яхши юридик адабиётларни аниқлаш мақсадида ташкил этилди. Унда Қозоғистон, Ўзбекистон, Россия ва Беларусь илмий ҳамда таълим ташкилотлари вакиллари қатнашди.
«Ўзбекистон Республикасида коррупцияга қарши мониторингнинг ташкилий-ҳуқуқий асосларини такомиллаштириш» номли монографияда мазкур йўналишнинг назарий-методологик ва ташкилий-ҳуқуқий асослари таҳлил қилинган, мавжуд муаммолар аниқланган ҳамда миллий тизимни ривожлантириш бўйича таклифлар ишлаб чиқилган.
Танлов ишлари мавзунинг долзарблиги ва илмий янгилиги, тадқиқотнинг чуқурлиги, амалий аҳамияти ҳамда хулосаларнинг ўзига хослиги каби мезонлар асосида баҳоланди.
