Ўзбекистон Республикаси Ҳуқуқни муҳофаза қилиш академиясида Тожикистон Республикаси ҳуқуқни муҳофаза қилувчи органларининг ходими учун бир ҳафта давом этган амалий ўқув курси якунланди. Курс кибержиноятчиликка қарши курашиш ва уни тергов қилишда рақамли криминалистика ҳамда очиқ манбалар асосида қидирув (OSINT) масалаларига бағишланди.

Академия ва ЕХҲТнинг Душанбедаги Дастурий офиси ҳамкорлигида ташкил этилган курсда Академия, Тожикистон Республикаси Ички ишлар вазирлиги ва Бош прокуратураси ходимлари, шунингдек ЕХҲТнинг Ўзбекистон ва Тожикистондаги ваколатхоналари вакиллари иштирок этди.

Машғулотларда тингловчилар рақамли криминалистика лабораториясининг имкониятлари билан танишиб, кибержиноятларни тергов қилиш, рақамли қурилмалар ва маълумотларни криминалистик тадқиқ этиш, рақамли далиллар билан ишлаш ва OSINT воситаларини қўллаш бўйича амалий машқлар бажардилар. Курс дастуридан киберҳуқуқ ва халқаро ҳуқуқий ёрдам масалалари ҳам ўрин олди.

Курс якунида иштирокчиларга сертификатлар топширилди. Машғулотлар кибержиноятчиликка қарши курашиш бўйича тажриба алмашиш ва Тожикистон ҳуқуқни муҳофаза қилувчи органлари ходимларининг амалий тайёргарлигини мустаҳкамлашга қаратилди.