Ўзбекистон Республикаси Ҳуқуқни муҳофаза қилиш академияси «Рақамли даврда қонун устуворлигини таъминлаш: инновациялар, инсон ҳуқуқлари ва хавфсизлик мутаносиблиги» мавзусидаги «TASHKENT CYBERLEX–2026» халқаро илмий-амалий конференцияси материаллари тўпламини нашр этди. 837 саҳифали икки жилдлик нашрдан 80 дан ортиқ илмий мақола ва тезис ўрин олган.
Тўпламда рақамли даврда қонун устуворлигини таъминлаш, кибермуҳитда инсон ҳуқуқларини ҳимоя қилиш ва хавфсизликни таъминлаш ўртасидаги мувозанатни сақлаш, кибержиноятчиликка қарши курашиш ҳамда рақамли криминалистика усулларини такомиллаштириш масалалари ёритилган. Шунингдек, сунъий интеллект ва рақамли технологияларни ҳуқуқни муҳофаза қилиш фаолияти ҳамда жиноят процессига татбиқ этиш, рақамли далиллар ва криптоактивларни тартибга солиш, юридик фан ва таълимни рақамли трансформация қилишга оид материаллар ҳам киритилган.
Муаллифлар орасида АҚШ, Япония, Хитой, Вьетнам, Туркия, Исроил, Озарбайжон, Қирғизистон ва бошқа давлатларнинг ҳуқуқ соҳасидаги етук олимлари ва малакали мутахассислари, шунингдек, Ўзбекистон юридик фан соҳасидаги кўзга кўринган профессор-ўқитувчилари, докторантлари, мустақил изланувчилари ва ёш олимлари бор. Материаллар 2026 йил 21–22 май кунлари Академияда ўтказилган халқаро илмий-амалий форум доирасида тайёрланган.
Тўплам Академиянинг расмий сайтида жойлаштирилган.
