ЎЗБЕКИСТОН РЕСПУБЛИКАСИ ҲУҚУҚНИ МУҲОФАЗА ҚИЛИШ АКАДЕМИЯСИ МАГИСТРАТУРАСИНИНГ «КИБЕРХАВФСИЗЛИКНИ ҲУҚУҚИЙ ТАЪМИНЛАШ» МУТАХАССИСЛИГИГА ХОРИЖИЙ ФУҚАРОЛАРНИ ҚАБУЛ ҚИЛИШ
ProAcademy
(71) 202-04-96
info@proacademy.uz
Заиф кўрувчилар учун

Янгиликлар

“Et docere et discere servitute legis”

ЎЗБЕКИСТОН РЕСПУБЛИКАСИ ҲУҚУҚНИ МУҲОФАЗА ҚИЛИШ АКАДЕМИЯСИ МАГИСТРАТУРАСИНИНГ «КИБЕРХАВФСИЗЛИКНИ ҲУҚУҚИЙ ТАЪМИНЛАШ» МУТАХАССИСЛИГИГА ХОРИЖИЙ ФУҚАРОЛАРНИ ҚАБУЛ ҚИЛИШ

ЎЗБЕКИСТОН РЕСПУБЛИКАСИ ҲУҚУҚНИ МУҲОФАЗА ҚИЛИШ АКАДЕМИЯСИ МАГИСТРАТУРАСИНИНГ «КИБЕРХАВФСИЗЛИКНИ ҲУҚУҚИЙ ТАЪМИНЛАШ» МУТАХАССИСЛИГИГА ХОРИЖИЙ ФУҚАРОЛАРНИ ҚАБУЛ ҚИЛИШ

Ўзбекистон Республикаси Ҳуқуқни муҳофаза қилиш академияси хорижий фуқароларни «Киберхавфсизликни ҳуқуқий таъминлаш» магистратура мутахассислиги бўйича рус тилида масофавий (онлайн) таълим шаклида таҳсил олишга таклиф этади.

Академия магистратураси ҳуқуқни муҳофаза қилувчи органлар, давлат бошқаруви ва ҳуқуқни қўллаш амалиёти учун юқори малакали мутахассислар тайёрлашга қаратилган замонавий таълим дастурларини амалга оширади.

«Киберхавфсизликни ҳуқуқий таъминлаш» йўналиши – халқаро миқёсидаги рақамли макондаги муносабатларни ҳуқуқий тартибга солиш, ахборот хавфсизлигини таъминлаш ҳамда кибертаҳдидлар ва рақамли технологиялар воситасида содир этиладиган ҳуқуқбузарликларга қарши курашишга оид билим ва компетенцияларни ривожлантиришга йўналтирилган замонавий фанлараро мутахассисликдир.

Таълим имкониятлари

Масофавий таълим жараёни замонавий ахборот-коммуникация технологиялари асосида ташкил этилиб, талабгорларга тажрибали профессор-ўқитувчилар раҳбарлигида ўқув машғулотларида онлайн иштирок этиш, электрон таълим ва ахборот-ресурсларидан фойдаланиш имконини беради.

Таълим олиш жараёнида талабгорлар қуйидаги имкониятлардан фойдаланишлари мумкин:

– масофавий таълим платформаси ва интерактив таълим хизматларидан, электрон ўқув материаллари ҳамда ахборот-ресурсларидан фойдаланиш;

– киберҳуқуқ, ахборот хавфсизлиги ва рақамли муҳитда ҳуқуқий тартибга солишга оид амалий вазиятлар ва кейсларни таҳлил қилиш;

– маҳаллий ва хорижий олимлар, соҳавий мутахассислар ҳамда экспертлар иштирокидаги семинарлар, тренинглар, халқаро илмий-амалий конференциялар ва форумларда иштирок этиш имкониятларидан фойдаланиш;

– Академия томонидан ташкил этиладиган маънавий-маърифий тадбирлар, илмий муҳокамалар ва касбий мулоқотларда иштирок этиш.

Таълим жараёнига ҳуқуқни қўллаш амалиёти бўйича юқори тажрибага эга миллий ва хорижий мутахассислар ҳамда олимлар жалб этилади. Машғулотлар назарий билимларни амалий мисоллар билан боғлаш, ҳуқуқий муаммоларни таҳлил қилиш ва тингловчиларнинг мустақил фикрлаш ҳамда тадқиқот кўникмаларини ривожлантиришга йўналтирилади.

Таълим шакли ва муддати

Ўзбекистон Республикаси Вазирлар Маҳкамасининг 2023 йил
6 апрелдаги 143-сон қарори билан тасдиқланган «Ўзбекистон Республикаси Ҳуқуқни муҳофаза қилиш академияси магистратурасига ўқишга қабул қилиш ва ўқитишни ташкил этиш тартиби тўғрисида»ги низомга кўра, талим шакли – масофавий (онлайн). Масофавий таълим шаклида магистратурада ўқиш муддати ўқув дастурларидан келиб чиқиб, Академия кенгашининг қарори билан бир ярим йилдан икки йилгача этиб белгиланади.

Талабгорларга қўйиладиган талаблар

Академия магистратурасига ҳуқуқшунослик соҳасида бакалавриат маълумотига ёки унга тенглаштирилган маълумотга эга хорижий фуқаролар ҳужжат топширишлари мумкин.

Хорижий фуқароларни магистратурага қабул қилиш Академиянинг Мувофиқлаштириш-васийлик кенгаши томонидан белгиланадиган қабул квотаси доирасида ҳамда тўлов-контракт асосида амалга оширилади. Қабул суҳбат натижалари ва тўпланган баллар кетма-кетлигига қатъий риоя этилган ҳолда, белгиланган қабул параметрлари доирасида амалга оширилади.

Ҳужжат топшириш тартиби

Талабгорлар белгиланган муддатда Академиянинг махсус электрон платформаси (https://admission.proacademy.uz)да рўйхатдан ўтиб, қуйидаги ҳужжатларни электрон шаклда тақдим этадилар:

          – паспорт (ID-карта) ёки унинг ўрнини босувчи ҳужжат;

          – олий маълумот тўғрисидаги диплом ва унинг иловаси.

Ҳужжатларни қабул қилиш муддати тугагандан кейин уларга ўзгартиш ва қўшимчалар киритишга йўл қўйилмайди.

 Ҳужжатларни топшириш муддати: жорий йилнинг 17 ноябридан
1 декабригача.

Суҳбат ўтказиш тартиби ва мезонлари

Хорижий фуқаролар Академия магистратурасига суҳбат асосида қабул қилинади. Суҳбат Академияда таълим бериладиган тилларда ўтказилади. Зарур ҳолларда суҳбат масофавий (онлайн) шаклда ташкил этилиши мумкин.

Суҳбат қуйидаги мезонлар бўйича ўтказилади:

– юриспруденция соҳасидаги профессионал билим ва кўникмалар, ҳуқуқий манбалар билан мустақил ишлаш ҳамда ҳуқуқий масалалар бўйича хулосаларни баён этиш қобилияти;

– илмий тадқиқот олиб бориш қобилияти, тизимли таҳлил ва танқидий фикрлаш, ҳуқуқшуносликка оид муаммоларни аниқлаш ва тадқиқот усулларини тушуниш;

– психологик хусусиятлар, умумий интеллектуал салоҳият, мантиқий фикрлаш, зийраклик ва таҳлил қилиш қобилияти;

– маънавий-маърифий тайёргарлик, ижтимоий-сиёсий билим ва жаҳонда рўй бераётган воқеалардан хабардорлик.

Суҳбат натижалари 100 баллик тизимда баҳоланади.

Юриспруденция соҳасидаги профессионал билим ва кўникмалар мезони бўйича энг юқори 40 балл, қолган ҳар бир мезон бўйича эса энг юқори
20 балл берилади. 55 балл ва ундан кам натижа тўплаган талабгор суҳбатдан ўтмаган деб ҳисобланади.

Талабгорлар билан суҳбат ўтказиш санаси жорий йилнинг
17 декабрига
режалаштирилган. 

Масофавий суҳбат учун техник талаблар

Онлайн суҳбатда иштирок этиш учун талабгор барқарор интернет алоқасига, соз микрофонга ва камида иккита видеокамерага (асосий ва қўшимча) эга бўлиши шарт. Суҳбат бошланишидан олдин шахсни тасдиқловчи ҳужжат (паспорт ёки ID-карта) камера орқали кўрсатилади. Талабгор тинч, ташқи таъсирлардан холи муҳитни таъминлаши лозим.

Қабул ва тўлов-контракт шартлари

Суҳбат натижаларига кўра талабгорларни Академия магистратурасига қабул қилиш Академия бошлиғининг буйруғи асосида амалга оширилади. Таълим тўлов-контракт асосида ташкил этилади. Контракт миқдори ва тўлов муддатлари тегишли шартномада белгиланади.

Қўшимча маълумотлар

Суҳбат саволлари ва талабгорлар ҳақидаги маълумотлар Академия томонидан алоҳида эълон қилинади. Талабгорларга эълон қилинадиган расмий маълумотларни кузатиб бориш тавсия этилади.

Ўзбекистон Республикаси Ҳуқуқни муҳофаза қилиш академияси магистратурасига қабул қилиш ва ўқитишни ташкил этиш тартиби тўғрисидаги низом билан қуйидаги ҳавола орқали танишишингиз мумкин: http://lex.uz/uz/docs/6425532.

Академия магистратурасига қабул жараёнлари билан боғлиқ янгиликлар Академиянинг расмий веб-сайти (www.proacademy.uz), ижтимоий тармоқлардаги расмий саҳифалари:

www.facebook.com/ProsecutorAcademy,

www.instagram.com/proacademyuz/,

https://t.me/TheLawEnforcementAcademy,

http://x.com/ProAcademyUz,

https://www.youtube.com/@HMQakademiyasi  ҳамда оммавий ахборот воситалари орқали танишиб боришингиз мумкин.

Шунингдек, Академия магистратурасига қабул билан боғлиқ маълумотларни +998 71 202-04-96 (ички: 1795 ва 1716) телефон рақами орқали ҳам билиб олишингиз мумкин.

Telegram Facebook