«Ҳуқуқни муҳофаза қилувчи органларда хотин-қизларнинг ўрни ва етакчилигини мустаҳкамлаш: халқаро стандартлардан миллий амалиётга» мавзусидаги халқаро конференция
ProAcademy
(71) 202-04-96
info@proacademy.uz
Заиф кўрувчилар учун

Янгиликлар

“Et docere et discere servitute legis”

«Ҳуқуқни муҳофаза қилувчи органларда хотин-қизларнинг ўрни ва етакчилигини мустаҳкамлаш: халқаро стандартлардан миллий амалиётга» мавзусидаги халқаро конференция

Хотин-қизларни раҳбарлик лавозимларига тайёрлаш ва қарорлар қабул қилишдаги иштирокини кенгайтириш «Ҳуқуқни муҳофаза қилувчи органларда хотин-қизларнинг ўрни ва етакчилигини мустаҳкамлаш: халқаро стандартлардан миллий амалиётга» мавзусидаги халқаро конференциянинг асосий мавзулари бўлди. Тадбир Ўзбекистон Республикаси Ҳуқуқни муҳофаза қилиш академияси томонидан ЕХҲТнинг Ўзбекистондаги лойиҳалар координатори офиси билан ҳамкорликда Ўзбекистонда прокуратура органлари ташкил этилганининг 35 йиллигига бағишланган Халқаро ҳуқуқни муҳофаза қилиш форумининг уч ҳафталик дастури доирасида ўтказилди.

Конференцияда Ўзбекистон, Қозоғистон ва Қирғизистон давлат органлари ҳамда соҳавий муассасаларининг раҳбарлари ва мутахассислари, ЕХҲТ эксперти ва Академия профессор-ўқитувчилари иштирок этди. Иштирокчилар таркиби ҳуқуқни муҳофаза қилиш тизимида хотин-қизларнинг касбий ривожланишига доир миллий ёндашувларни қиёслаш имконини берди.

Тадбирнинг очилишида Ўзбекистон Республикаси Бош прокурорининг ўринбосари Светлана Артикова Ўзбекистон Республикаси Президентининг қўллаб-қувватлаши билан сўнгги йилларда амалга оширилаётган ислоҳотлар хотин-қизларнинг давлат ва жамият ҳаётидаги, жумладан, ҳуқуқни муҳофаза қилиш тизимидаги ўрнини мустаҳкамлашга хизмат қилаётганини таъкидлади.

Халқаро тажриба алмашуви давомида Қозоғистон Республикаси Бош прокуратураси ҳузуридаги Ҳуқуқни муҳофаза қилиш органлари академиясининг биринчи проректори Сауле Сапаралиева раҳбарлик лавозимларида хотин-қизлар улушини ошириш бўйича миллий амалиётни тақдим этди. Қирғизистоннинг хавфсизлик, ҳуқуқ-тартибот ва қонунийлик соҳаларидаги хотин-қизлар ассоциацияси раиси, профессор Каана Айдаркул хотин-қизлар касбий бирлашмаларининг ушбу соҳалар мутахассислари ўртасидаги ҳамкорликка қўшаётган ҳиссаси ҳақида сўз юритди.

ЕХҲТнинг Молдовадаги миссияси раҳбари ўринбосари Изабела Сильвия Хартманн хавфсизлик секторини ислоҳ қилишда гендер тенглиги тамойилларини кадрлар сиёсатида, раҳбар кадрларни тайёрлашда, қарорлар қабул қилишда ва идоралар фаолиятини баҳолашда ҳисобга олиш масалаларини ёритди.

Ўзбекистонлик иштирокчилар хотин-қизлар ҳуқуқларини ҳимоя қилишга оид ҳуқуқий кафолатларни амалда қўллаш бўйича миллий тажрибани тақдим этдилар. Шунингдек, улар ҳуқуқни муҳофаза қилувчи органлар фаолиятида хотин-қизлар иштирокини кенгайтиришга қаратилган «Аёллар, тинчлик ва хавфсизлик» кун тартиби бўйича миллий ҳаракатлар режаларини ишлаб чиқиш масалаларини муҳокама қилдилар.

Қозоғистон Ички ишлар вазирлиги Маъмурий полиция қўмитасининг оилавий-маиший зўравонликка қарши курашиш бошқармаси бошлиғи Акмарал Серикбаева зўравонлик хавфини барвақт аниқлаш, жабрланувчилар хавфсизлигини таъминлаш ҳамда полиция ва ижтимоий хизматлар ўртасидаги ҳамкорликни йўлга қўйиш бўйича амалий чораларни тақдим этди.

Конференция якунида иштирокчилар хотин-қизларни раҳбарлик лавозимларига тайёрлаш ва кадрлар захирасини шакллантиришни тизимли йўлга қўйиш бўйича тавсиялар ишлаб чиқдилар. Шунингдек, гендер тенглигига оид маълумотларни тўплаш ва таҳлил қилишни такомиллаштириш ҳамда миллий қонунчиликни ривожлантиришда илғор хорижий тажрибани ҳисобга олиш учун давлат органлари ва халқаро ташкилотлар ўртасидаги ҳамкорликни мустаҳкамлаш таклиф этилди.

Академияда Халқаро ҳуқуқни муҳофаза қилиш форуми доирасидаги илмий ва ўқув тадбирлари туркуми давом этмоқда.

Telegram Facebook