Вена шаҳрида бўлиб ўтган ҳамкорлик учрашувида Академия вакилининг иштироки

Жорий йилнинг 26-27 ноябрь кунлари Вена шаҳрида БМТ Глобал кун тартибининг 2030 йилгача бўлган даврда Барқарор ривожланиш мақсадлари (БРМ) асосида ташкил этилган “Болалар учун ижтимоий адолатнинг самарадорлигини таъминлаш мақсадида ўзгаришлар мониторинги” тадқиқоти (TransMonEE) дастурининг йиллик учрашувида Бош прокуратура Академиясининг ходими иштирок этди.

TransMonEE дастури ЮНИСЕФ Тадқиқот маркази раҳбарлигида Марказий ва Шарқий Европа, МДҲ ва Болтиқбўйи мамлакатларида болалар, ёшлар ва аёллар фаровонлигининг ижтимоий-иқтисодий жиҳатларини мунтазам равишда кузатиб бориш мақсадида амалга оширилмоқда.

Йиғилишда болаларни ҳимоя қилиш мониторинг тизимига оид масалалар, шу жумладан БРМ 16.2-вазифаси (болалар ва аёлларга нисбатан зўравонликнинг барча турларини тугатиш) ҳамда БРМ 5-мақсади (гендер тенгликни таъминлаш ва барча хотин-қизларнинг ҳуқуқ ва имкониятларини кенгайтириш) билан боғлиқ индикаторлар методологияси масалалари муҳокама қилинди.

Тадбир якунига кўра 2030 йилгача бўлган даврда барқарор ривожланиш соҳасидаги Миллий мақсадларини янада самарали амалга ошириш мақсадида тавсиялар ишлаб чиқилди.