Академия магистратураси тингловчилари иштирокида тренинг ўтказилди

2021 йил 26 январь куни Ўзбекистон Республикаси Бош прокуратураси Академиясида “Жисмоний имконияти чекланган шахслар ҳуқуқларини ҳимоя қилиш механизмлари” мавзусида тренинг бўлиб ўтди.

Машғулотни Ўзбекистон ногиронлар Ассоциацияси раисининг ўринбосари, Мирзо Улуғбек номидаги Ўзбекистон Миллий университети кафедраси доценти Абдулла Абдухалилов ўтказди.

Тадбирда Бош прокуратура Академияси магистратураси тингловчилари иштирок этди.

Тренингда жисмоний имконияти чекланган шахслар учун тўсиқсиз муҳит яратиш, уларнинг ҳуқуқ ва манфаатлари ҳимоя қилинишини таъминлаш, ногиронлиги бўлган шахслар ҳуқуқларига риоя этилиши устидан жамоатчилик назоратининг таъсирчан механизмларини шакллантириш масалалари кўриб чиқилди.

Баҳс-мунозаралар жараёнида тингловчилар томонидан соҳага оид халқаро ҳуқуқий нормаларни имплементация қилиш ва амалга ошириш борасидаги ишларни такомиллаштириш масалалари муҳокама қилинди.