Япония Aдлия вазирлиги билан жиноятчилик аҳволини тизимли ўрганиш йўналишидаги қўшма лойиҳа давом этмоқда

Жорий йилнинг 27 январь куни жиноятчилик ҳолатини узлуксиз мониторинг қилиш салоҳиятини мустаҳкамлаш борасида Япония Aдлия вазирлиги ва Ўзбекистон Республикаси Бош прокуратураси Академияси қўшма ишчи гуруҳининг навбатдаги онлайн учрашуви бўлиб ўтди.

Учрашув давомида Япония томони жиноятларнинг турлари бўйича статистик маълумотларни классификация қилиш тартиби тўғрисида маълумот берди. Жумладан, прокуратура органлари томонидан тергов амалга ошириладиган жиноятлар тахлили тўғрисида маълумотларни ҳисоботда акс эттириш услубиёти муҳокама қилинди.

Ўз навбатида, Бош прокуратура Академияси томонидан содир этилган жиноятларнинг маҳаллалар кесимидаги таҳлилининг Академия томонидан ойлик чоп этиладиган дайджестда акс эттирилишига оид маълумот берилди. Академия таҳлилий фаолияти Япония томонида катта қизиқиш уйғотди ва юқори баҳоланди.

Томонлар келгусида қўшма лойиҳани амалга ошириш доирасида жиноятлар статистикасини юритишда қўлланиладиган ахборот-техник воситаларни кўриб чиқадилар.