“Замонавий юридик фан ва таълим: долзарб муаммолар ва уларни ҳал этиш йўллари” мавзусида халқаро илмий-амалий конференция якунлари ҳақида

2021 йил 27-28 май кунлари Ўзбекистон Республикаси Бош прокуратураси Академияси ташкил этилганлигининг 3 йиллигига бағишланган “Замонавий юридик фан ва таълим: долзарб муаммолар ва уларни ҳал этиш йўллари” мавзусида халқаро илмий-амалий онлайн конференция ташкил этилди.

Конференциянинг асосий мақсади таълим жараёнида инновацион ёндашувларни муҳокама қилиш, замонавий таҳдидларни инобатга олган ҳолда ҳуқуқни муҳофаза қилиш соҳаси кадрларини тайёрлаш борасида тажриба алмашиш, коррупцияга қарши курашиш, жиноий даромадларни легаллаштириш ва терроризмни молиялаштиришга қарши курашиш, шунингдек инсон ҳуқуқларини таъминлаш соҳаларида халқаро стандартларни имплементация қилиш бўйича тавсиялар ишлаб чиқишдан иборат.

Тадбир Европада хавфсизлик ва ҳамкорлик ташкилоти, БМТнинг Гиёҳвандлик ва жиноятчилик бўйича бошқармаси, БМТнинг Инсон ҳуқуқлари бўйича Олий комиссари Бошқармаси ҳамда “Минтақавий мулоқот” ХННТ кўмагида ташкил этилди.

Анжуман ялпи ва тематик сессиялар шаклида ташкил этилган бўлиб, тадбирнинг биринчи куни замонавий шароитда таълим жараёнини ташкил қилишдаги муаммолар, юридик фан ва ҳуқуқни қўллашнинг долзарб муаммолари, тергов фаолиятининг долзарб масалалари ва ривожланиш истиқболлари муҳокама қилинди.

Конференциянинг иккинчи кунида ҳуқуқни муҳофаза қилувчи органлар фаолиятида инсон ҳуқуқларини таъминлаш, коррупцияга қарши стандартларни имплементация этиш, шунингдек жиноий даромадларни легаллаштиришга қарши курашиш, терроризмни молиялаштириш ва жиноий активларни қайтариш масалаларига бағишланган параллел сессиялар бўлиб ўтди.

Иккинчи кун сессияларида “Минтақавий мулоқот” ХННТ эксперти Г.Уэддл, Халқаро коррупцияга қарши кураш академияси профессори Э.Иванов, Россия Федерацияси Прокуратура университети прокуратура фаолияти соҳасидаги халқаро ҳамкорлик бўлими бошлиғи Г.Куликова, Беларусь Республикаси Бош прокуратурасининг қонунийлик ва ҳуқуқ-тартиботни мустаҳкамлаш илмий-амалий маркази директори ёрдамчиси А.Карабельникова, Россия Федерацияси Тергов қўмитаси Санкт-Петербург академиясининг жиноят ҳуқуқи ва криминология кафедраси доценти В.Лавринов, Жиноий фаолиятдан олинган даромадларни легаллаштиришга ва терроризмни молиялаштиришга қарши курашиш бўйича Евроосиё гуруҳининг Котибияти маъсул ходими Д.Воробьев, Россия Федерацияси Тергов қўмитаси Санкт-Петербург академиясининг жиноят процесси кафедраси катта ўқитувчиси.И.Бутырцева, БМТнинг ГЖҚКБ маслаҳатчиси А.Водяной, Беларусь давлат университети судьяларни, прокуратура, суд ва адлия муассасалари ходимларини қайта тайёрлаш ва малакасини ошириш Институти илмий-услубий ишлар бўйича директор ўринбосари С.Лещенко, БМТнинг ГЖҚКБнинг активларни қайтариш бўйича Афғонистон ва қўшни давлатлар маслаҳатчиси Дж.Томас, БМТнинг Инсон ҳуқуқлари Олий Комиссари бошқармаси мутахассиси Ё.Олхаген, Раул Валленберг номидаги Инсон ҳуқуқлари ва гуманитар ҳуқуқ Институти Европа офиси директори З.Заланова, Раул Валленберг номидаги Инсон ҳуқуқлари ва гуманитар ҳуқуқ Институтининг “Самарали одил судлов” тематик гуруҳ раҳбари Дж.Оунстед, ЕҲХТ/ДИИҲБ Инсон ҳуқуқлари бўйича Департамент бошлиғи А.Хубер, ЕҲХТ/ДИИҲБ Инсон ҳуқуқлари бўйича Департамент бошлиғи ўринбосари А.Гарднер маъруза қилдилар.

Конференция ишида илм-фан ва таълим соҳасидаги 500 дан зиёд хорижий ва миллий экспертлар, шунингдек 20 дан ортиқ давлат ва 10 халқаро ташкилот вакиллари иштирок этишди.

Конференция натижаларига кўра ҳуқуқни муҳофаза қилиш соҳасидаги илмий ва таълим салоҳиятини ошириш, долзарб соҳа ва йўналишларда идоралараро ва халқаро ҳамкорликни мустаҳкамлашга қаратилган амалий тавсиялар қабул қилинди.

Маъруза тезислари ва сессиялар мавзуларига оид илмий мақолалар халқаро конференция материаллари тўпламида чоп этилади.