Судларда прокурор ваколатини таъминлаш кафедраси Ўзбекистон Республикаси Президентининг 2018 йил 8 майдаги “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида”ги ПФ-5438-сон Фармонига асосан Ўзбекистон Республикаси Бош прокуратураси Академиясининг таркибий тармоғи ҳисобланади.
Кафедра ўз фаолиятини Ўзбекистон Республикаси Конституцияси, Ўзбекистон Республикасининг “Прокуратура тўғрисида”ги Қонуни ва бошқа қонун ҳужжатлари, Ўзбекистон Республикаси прокуратураси органлари ва муассасаларида хизматни ўташ тўғрисидаги Низом, Ўзбекистон Республикаси Президентининг 2018 йил 8 майдаги “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида”ги ПФ-5438-сон Фармони, Ўзбекистон Республикаси Бош прокурорининг 2018 йил 31 майдаги 190-сон буйруғи билан тасдиқланган Ўзбекистон Республикаси Бош прокуратураси Академиясининг Устави, Бош прокуратуранинг ҳайъати қарорлари, Бош прокурор ва Академия бошлиғи буйруқлари асосида амалга ошириб келади.
Кафедрада бугунги кунда 6 нафар ходим фаолият юритиб келмоқда, уларнинг бир нафари кафедра доценти, бир нафари фан номзоди, 3 нафари мустақил изланувчилар.
Кафедранинг асосий вазифалари:
- жиноят, фуқаролик, иқтисодий ҳамда маъмурий суд ишларини юритишда прокурор ваколатини таъминлаш йўналишларида кадрларни тайёрлаш, қайта тайёрлаш ва ходимларнинг малакасини ошириб боришни таъминлайди;
- судларда ишларни кўрилишида ягона ҳуқуқни қўллаш амалиётини шакллантиришда иштирок этади ва йўналишлар бўйича суд-прокурор амалиётини таҳлил қилиб боради;
- прокуратура органлари фаолиятини илмий-методик жиҳатдан таъминлаш, фундаментал, амалий тадқиқотлар ўтказиш ишларида иштирок этади, амалиётда мавжуд муаммоларни таҳлил этиб, илмий анжуманлар, семинар, конференциялар муҳокамасига киритиб боради;
- кадрларни тайёрлаш, қайта тайёрлаш ва ходимларнинг малакасини ошириб бориш ишларида идораларо ва муассасавий ҳамкорликни таъминлаб боради.
Юқорида қайд этилган асосий вазифалар доирасидан келиб чиқиб, кафедра томонидан қуйидаги ишлар амалга ошириб келинмоқда:
Барча суд йўналишлари бўйича мунтазам равишда малака ошириш ўқув курслари ташкил этилиб ўтказилмоқда.
Бундан ташқари, раҳбар кадрларни қайта тайёрлаш, ёш мутахассисларнинг малакасини ошириш, Академия магистратурасида ўқитиш жараёнларида ҳам фаол иштирок этилмоқда.
Ходимларни ўқитишда асосий эътибор амалиётга йўналтирилиб, муаммоли вазиятларни ҳал қилишда қонун ҳужжатларини тўғри қўллай олиш ҳамда ўз фикрини ёзма ва оғзаки асослай олиш масалаларига қаратилмоқда.
Кафедра прокуратура органлари фаолиятини илмий-методик таъминлаш ишларида ҳам фаол иштирок этиб, қуйидагиларни амалга оширди:
- жиноий суд ишларини юритишда прокурор ваколатини таъминлаш фаолияти бўйича услубий қўлланма (2019 йилнинг 28 июнь куни БП ҳайъатида муҳокама этилиб маъқулланган Д.С.Довудова);
- маъмурий суд ишларини юритишда прокурор иштирокининг ташкилий-ҳуқуқий асослари мавзусида ўқув-амалий қўлланма (2019 йилнинг 28 июнь куни Илмий кенгашда муҳокама этилган Э.Т.Хожиев, Ш.И.Шайзаков);
- прокурорнинг жиноий суд процессидаги иштироки 2 қисмдан иборат видеоролик (1-қисм суд процессидаги суд хатолари юзасидан ва 2-қисм судда прокурор иштироки қандай бўлиши керак) тайёрланган;
- конкрет тоифадаги жиноят ишлари бўйича прокурорларнинг намунавий нутқлари Тўплами;
- низоларни ҳал этишда фуқаролик ҳуқуқ нормаларини қўллашнинг айрим долзарб масалалари Практикуми (С.Б.Холбаев);
- судлар томонидан жиноий жазоларни тайинлаш ҳамда жиноятларни квалификация қилишнинг айрим долзарб масалалари Практикуми;
- жиноят суд процессида прокурор нутқи. Прокурорнинг нотиқлик санъати ўқув-амалий қўлланма (М.З.Раджапова);
- маъмурий, фуқаролик ва иқтисодий суд процессларида прокурор иштирокининг процессуал-ҳуқуқий асослари ўқув-амалий қўлланма (М.З.Раджапова).
