Бош прокуратура Академияси таркибида Суд ҳужжатлари ва бошқа органлар ҳужжатларини мажбурий ижро этиш кафедраси ташкил этилишидан асосий мақсад – суд ҳужжатлари ва бошқа органлар ҳужжатлари бўйича ижро иши юритиш ҳамда жиноий жазоларни ижро этилишини таъминлаш соҳасидаги қонунчилик ижроси устидан назоратини ташкил этишда прокурор ходимларни тизимли равишда касбий қайта тайёрлаш ҳамда уларнинг малакасини ошириб боришдан иборатдир.
Ўзбекистон Республикаси Бош прокуратураси ҳузурида Мажбурий ижро бюросида бугунги кунда жами 12 мингдан ортиқ ходим фаолият кўрсатаётган бўлиб, шундан 2.329 нафари давлат ижрочилари, 5.438 нафари давлат инспекторларидир.
Академиянинг Суд ҳужжатлари ва бошқа органлар ҳужжатларини мажбурий ижро этиш кафедрасига суд ҳужжатлари ва бошқа органлар ҳужжатларининг ижросини таъминлаш, жиноий жазолар ҳамда бошқа жиноий-таъсир чораларни ижро этишда қонунларга риоя этилиши устидан назорат самарадорлигини ошириш юзасидан фаолият олиб борувчи ходимларнинг соҳага оид касбий билим ва амалий кўникмаларини янада такомиллаштириш Академиянинг асосий вазифаларидан бири ҳисобланиб, ушбу жараённи ташкиллаштириш учун кафедрага олтита штат бирлиги ажратилган.
Кафедранинг асосий вазифалари:
– ушлаб турилганларни, қамоққа олинганларни сақлаш жойларида, жиноий жазоларни ва жиноят-ҳуқуқий таъсирнинг бошқа чораларини ижро этиш чоғида қонунларга риоя этиш ҳамда қонун устуворлигини таъминлаш йўналиши бўйича ходимларни касбий қайта тайёрлаш, малакасини ошириш ҳамда раҳбар кадрларни тайёрлаш юзасидан ўқув машғулотларини ташкиллаштириш;
– ижро иши юритувида қонунийликни таъминлаш бўйича давлат ижрочиларининг малакасини ошириш;
– энергия ресурслари ва сувдан фойдаланишдаги талон-тарожликларни аниқлаш, бартараф этиш ҳамда уларнинг олдини олиш, шунингдек қарздорликни камайтириш ва тўлов интизомини мустаҳкамлаш бўйича Бюронинг ваколатли ходимларини малакасини ошириш;
– суд ҳужжатлари ва бошқа органлар ҳужжатларининг мажбурий ижроси, жиноий жазолар ижросига оид қонунларга риоя этилиши устидан прокурор назорати самарадорлигини оширишга доир илмий-тадқиқотларни амалга ошириш;
– ходимларни касбга қайта тайёрлаш ва уларнинг малакасини ошириш бўйича таълимнинг замонавий усулларини амалиётга татбиқ қилиш;
– Жиноят-ижроия ва ижро соҳасидаги қонун ҳужжатларини такомиллаштириш юзасидан амалий таклифлар, тавсиялар ишлаб чиқиш ва соҳада ягона ҳуқуқни қўллаш амалиётини шакллантиришга қаратилган қўлланмаларни ишлаб чиқишдан иборатдир.
Кафедрада “Мажбурий ижро бюроси томонидан суд ҳужжатлари ва бошқа органлар ҳужжатларини ижро этиш фаолияти”, “Суд ҳужжатлари ва бошқа органлар ҳужжатларини ҳамда жиноий жазоларни ижро этишда қонунларга риоя этилиши устидан прокурор назорати”, “Энергия ресурслари, сув таъминоти, сув чиқариш ва маиший чиқиндилар соҳасида қарздорлик ундирувини мувофиқлаштириш фаолияти” мавзулари бўйича яратилган ўқув-методик мажмуалар асосида тегишли раҳбар кадрларни қайта тайёрлаш ва ходимларнинг малакасини ошириш курслари ташкил этиб келинган.
Кафедра томонидан 2018 йилда 140 нафарга яқин тингловчилар иштирокида малака ошириш курслари ташкил этилган.
2019 йилда масофавий таълим орқали 418 нафар Мажбурий ижро бюросининг давлат ижрочилари ҳамда 1.515 нафар давлат инспекторлари малака ошириш машғулотларига жалб этилди.
Суд ҳужжатлари ва бошқа органлар ҳужжатларининг ижро қилинишини таъминлаш билан боғлиқ муаммоларни бартараф этиш ҳамда тегишли тавсиялар берилишини таъминлаш мақсадида 6 маротаба республика миқёсида видеоконференц алоқа режимида ўқув семинарлар ташкил этилган.
Шунингдек, кафедра томонидан Мажбурий ижро бюросига янги қабул қилинганлар ходимлар учун “Прокуратура органларининг ҳуқуқий мақоми ва мажбурий ижро бюроси” номли ўқув қўлланма, ҳуқуқни қўллаш амалиётида ижро ҳужжатларини ижросини таъминлашда энг кўп учраётган муаммоли ҳолат ва вазиятлардан келиб чиқиб, «Суд ҳужжатлари ва бошқа органлар ҳужжатларини ижро этишнинг қонунийлигини таъминлаш» мавзусида практикум ҳамда Бюрода ижро ҳужжатлари билан боғлиқ ижро ишини юритиш бўйича ягона амалиётни шакллантиришга қаратилган “Мажбурий ижро бюросида фойдаланадиган процессуал ҳужжатлар намуналари” тайёрланди.
Бундан ташқари, кафедра аъзолари Ўзбекистон Республикаси Президентининг 2018 йил 7 ноябрдаги ПҚ-4006-сон қарор билан тасдиқланган “2019 — 2021 йилларда Ўзбекистон Республикаси жиноят-ижроия қонунчилигини такомиллаштириш” Концепцияси ижроси бўйича янги таҳрирдаги Жиноят-ижроия кодекси лойиҳасини ҳамда Ўзбекистон Республикаси Президентининг 12.03.2019 йилдаги “Суд ҳужжатлари ва бошқа органлар ҳужжатларини ижро этиш самарадорлигини янада ошириш чора-тадбирлар тўғрисида”ги ПҚ-4236-сонли Қарори ижроси бўйича Ўзбекистон Республикасининг Ижро ишини юритиш тўғрисидаги кодекс лойиҳаларини ишлаб чиқиш юзасидан тузилган ишчи гуруҳ аъзоси сифатида иштирок этмоқдалар.